Til – tatýlyq tiregi

Osylaı atalǵan baıqaý memlekettik tildiń ózge etnostar­ arasynda qoldanylý aıasyn keńeıtý maqsatyn dittep, ­oblys ortalyǵyndaǵy «Dostyq úıinde» uıymdastyryldy. 17 úmitker qatysqan saıys Qazaqstan halqy Assambleıasynyń 20 jyldyǵyna arnaldy. Olarǵa «Til – tatýlyq tiregi» taqyrybynda beınerolık ázirleý, memlekettik tildi qanshalyqty dárejede meńgergenin aıǵaqtaıtyn esse jazý jáne arnaıy bıletter boıynsha daıyndalǵan suraqtarǵa jaýap berý talaptary qoıyldy. – Baıqaý memlekettik tildiń mártebesin kóterýge, qazaqstandyq patrıotızmdi nasıhattaýǵa, ózge ult ókilderiniń qazaq tilin oqyp-úırenýge degen ynta-yqylasyn arttyrýǵa baǵyttalǵan, – degen edi saıys aldyndaǵy suhbatynda «Qoǵamdyq kelisim» kommýnaldyq memlekettik mekemesiniń dırektory Dına Ábilmájinova. Saıyskerler «á» degennen-aq ózderiniń jarysqa tyńǵylyqty daıyndalyp kelgenderin baıqatty. Qaı-qaısysy bolsyn ózin jáne otbasyn, jumys orny men turǵy­lyqty jerin qazaq tilinde jatyq tanystyrdy. Desek te, birinshi synda Jambyl aýdanynan kelgen Ekaterına Qalıjanovanyń ozyq shyqqany baıqalyp turdy. Mektepte is qaǵazdary mamany bolyp jumys isteıtin ol qazaq tilin jastaıynan bilip ósipti. Qazaq otbasyna kelin bolyp túskennen keıin ulttyq salt-dástúrlerdi bir kisideı meńgerip alǵanǵa uqsaıdy. Odan Ǵ.Músirepov aýdanynyń atynan synǵa túsken ulty áze­r­baıjan Aıgúl Ýálıeva da qalysa qoımaǵan tárizdi. Onyń memlekettik tildegi bilim oshaǵynda eńbek etýi qazaq tilin erkin bilýine kóp septigin tıgizgen syńaıly. Esse jazý, suraq-jaýap tapsyrmalary da múltiksiz oryndalyp, qazylar alqasyna jeńimpazdar men júldegerlerdi anyqtaý ońaıǵa túsken joq. Saıys qorytyndysy saralana kele, petropavldyq Vıktorııa Govorýhına bas júldeni talassyz jeńip aldy. Olaı bolatyn reti bar. Ol M.Qozybaev atyndaǵy Soltústik Qazaqstan memlekettik ýnıversıtetin bitirip, qazaq tili men ádebıeti páni muǵalimi mamandyǵyn alyp shyqqan. Birinshi, ekinshi oryndardy oblys ortalyǵynyń namysyn qorǵaǵan Ýlıana Gabrıkova men Nıkolaı Tıhnenko ıelendi. Úshinshi oryndy aıyrtaýlyq Na­dejda Batenova men Ǵ.Músirepov aýdanynyń ókili Aıgúl Ýálıeva bólisti. Jeńimpazdar arnaıy dıp­lomdarmen, baǵaly syılyqtarmen marapattaldy. – Jaqynda Elbasymyz Qazaq­stan halqy Assambleıasy jyly­nyń bastalýyn jarııalap, onyń máre alýy bizdiń oblysta da keńi­nen­ atap ótildi. Jergilikti Assamb­­leıa quramyndaǵy 23 etnobir­lestik mereıli sharalarǵa belsen­dilikpen atsalysyp keledi. Biz Táýel­sizdigimizdi, yntymaq-kelisi­mimizdi nyǵaıtýǵa arnalǵan qundy­lyq­ta­rymyzdy qashanda bıik qaster­leı­miz, – dedi sóıleskenimizde jarys­tyń bas jeńimpazy V. Govorýhına. Ol endi Astanada ótetin kon­kýrsta óńirimizdiń namysyn qorǵaıtyn bolady. О́mir ESQALI, «Egemen Qazaqstan». Soltústik Qazaqstan oblysy. Sýretti túsirgen Talǵat TÁNIBAEV.