Otyrysty ashqan Májilis spıkeri keıingi jyldary Qazaqstan men О́zbekstan arasynda joǵary deńgeıdegi birqatar ózara sapar ótip, Odaqtastyq qatynastar týraly jáne Memlekettik shekarany demarkasııalaý týraly sharttar men 2024–2034 jyldarǵa arnalǵan strategııalyq áriptestik baǵdarlamasy sııaqty tarıhı qujattarǵa qol qoıylǵanyn atap ótti.
– Eki el prezıdentteriniń saıası erik-jigeri men danalyǵynyń arqasynda qazaq-ózbek baılanysy buryn-sońdy bolmaǵan bıik deńgeıge jetti. 100-den asa kelisimnen turatyn berik sharttyq-quqyqtyq baza qalyptasty. Olar bizdiń qarym-qatynastarymyzdyń barlyq salasyn qamtıdy. Yntymaqtastyqtyń jańa formatynyń ınstıtýsıonaldyq negizi qalandy. Prezıdentterimiz yqpaldastyqtyń basym baǵyttaryn aıqyndap, olardy ilgeriletý úshin naqty mindetter qoıdy, – dedi E.Qoshanov.
Ol eki el arasyndaǵy parlamentaralyq yqpaldastyqtyń júıeli sıpat alyp, naqty mazmunmen tolyǵa túskenine nazar aýdardy. Bul úrdis kópjaqty alańdarda da júzege asyp keledi. Iske asyrylǵan bastamalar qatarynda Ortalyq Azııa memleketteriniń parlamentaralyq forýmy, Ortalyq Azııa elderi áıelderi dıalogi aıasyndaǵy is-sharalar jáne Tashkent qalasynda tabysty ótken Halyqaralyq Parlamentaralyq odaqtyń 150-Assambleıasy bar.
О́z kezeginde Nýrıddın Ismoılov parlamentaralyq dıalog elder arasyndaǵy senimdi nyǵaıtýdyń mańyzdy faktory ekenin jáne memleket basshylarynyń strategııalyq kelisimderin júzege asyrýǵa septigin tıgizetinin aıtty.
– Parlamentaralyq yntymaqtastyq keńesiniń formaty júıeli ári praktıkalyq máni zor. Parlamenttik dıalog memleketaralyq yntymaqtastyqqa ilesip qana qoımaı, sonymen qatar ony nyǵaıtýǵa, ekonomıka, áleýmettik sala, bilim berý jáne gýmanıtarlyq baǵyttaǵy birlesken bastamalardy ilgeriletýge yqpal etýge tıis degen pikirdemiz, – dedi Olıı Majlıs Zań shyǵarý palatasynyń spıkeri.
Keńestiń ekinshi otyrysynyń negizgi taqyryby ekonomıka, aqparattyq tehnologııalar jáne jasandy ıntellekt sııaqty baǵyttar boıynsha yntymaqtastyqtyń perspektıvalaryna, sondaı-aq mádenı-gýmanıtarlyq jáne týrıstik salalardaǵy jobalarǵa arnaldy.
Taraptar saýda-ekonomıka men agrarlyq salalardaǵy seriktestikti keńeıtý, mádenıet pen bilim baǵytyndaǵy yntymaqtastyqtyń joǵary qarqynyn saqtaý, ekologııa, energetıka jáne sý resýrstary máselelerin birlesip sheshý boıynsha eki el kóshbasshylary arasyndaǵy kelisimderdi iske asyrýda ilgerileýshilik bar ekenin atap ótti.
Sonymen qatar Májilis spıkeri kún tártibindegi basym baǵyttarǵa nazar aýdardy. Olardyń qatarynda Qazaqstan men О́zbekstan arasyndaǵy ekijaqty taýar aınalymyn 2030 jylǵa qaraı 10 mlrd dollarǵa deıin ulǵaıtý mindeti de bar. Depýtattar osy mejege tezirek qol jetkizý úshin qajetti zańnamalyq sharalardy talqylady.
– Búginde Qazaqstan О́zbekstannyń eń iri úsh saýda seriktesiniń qataryna kiredi. Eki el arasyndaǵy taýar aınalymy jyl saıyn 4 mlrd dollardy quraıdy. Keıingi jyldary ózara tıimdi yntymaqtastyqtyń negizgi qozǵaýshy kúshi ónerkásiptik kooperasııa, avtokólik qurastyrý, aýyl sharýashylyǵy jáne logıstıka bolyp otyr, – dedi E.Qoshanov.
Otyrys barysynda depýtattar joǵary deńgeıde qol jetkizilgen úsh negizgi kólik-logıstıka jobasynyń júzege asyrylý máselelerin de talqylady. Olar: Darbaza – Maqtaaral temirjol jelisiniń qurylysy, Tashkent oblysynda Kópfýnksıonaldy logıstıka ortalyǵyn qurý, sondaı-aq Qyzylorda – Úshqudyq temirjol jáne avtomobıl jolynyń qurylysy.
Sonymen qatar О́zbekstan Respýblıkasy Olıı Majlısynyń Zań shyǵarýshy palatasy delegasııasyna Qazaqstan men О́zbekstan prezıdentteriniń tapsyrmalaryn oryndaý boıynsha júzege asyrylǵan ónerkásiptik jobalar tanystyryldy. Olardyń ishinde birqatar birlesken kásiporyn bar. Atap aıtqanda, Qostanaı oblysyndaǵy avtokólik zaýyty, Qaraǵandy oblysyndaǵy turmystyq tehnıka shyǵaratyn kásiporyn men Shymkent qalasyndaǵy medısınalyq buıymdar óndirisimen aınalysatyn zaýyt. Sondaı-aq mártebeli meımandarǵa Almaty mańynda ornalasqan «Alatau City» – ınnovasııalyq qalasy jáne «Jańa Jibek joly» boıyndaǵy jahandyq týrıstik ortalyǵy tanystyryldy. Jobanyń alǵashqy kezegin iske qosý 2030 jylǵa josparlanǵan. «Alatau City» jańa óndirister men jumys oryndarynyń ashylýyn qamtamasyz etip, óńirdegi damý ortalyǵyna aınalýǵa tıis.
Jumys saparynyń baǵdarlamasynda Ál-Farabı atyndaǵy Qazaq ulttyq ýnıversıtetiniń bazasynda ornalasqan Farabi HUB joǵary tehnologııalyq jobalar men startaptardy damytý platformasyna jáne Almaty qalasynyń mádenı nysandaryna barý josparlanǵan.
Aıta keteıik, Qazaqstan Respýblıkasy Parlamenti Májilisi men О́zbekstan Respýblıkasy Olıı Majlısynyń Zań shyǵarýshy palatasy arasyndaǵy Parlamentaralyq yntymaqtastyq jónindegi keńesti qurý týraly sheshim О́zbekstan Prezıdenti Shavkat Mırzııoevtiń 2021 jylǵy jeltoqsan aıynda Astanaǵa jasaǵan memlekettik sapary aıasynda qabyldandy. Onyń alǵashqy otyrysy 2023 jyly qazan aıynda Tashkent qalasynda ótti. Keńes – eki eldiń memleket basshylary arasynda qol jetkizilgen kelisimderdi júzege asyrýǵa járdemdesý jáne zańnamalyq turǵyda qamtamasyz etý maqsatymen qurylǵan birlesken jumys organy.
