Syr boıynyń rýhanı ordasy
Mádenı-nysannyń saltanatty ashylý rásimine Premer-mınıstrdiń orynbasary Ermek Kósherbaev, oblys ákimi Nurlybek Nálibaev, «Samuryq-Qazyna» AQ basqarýshy dırektory Ǵıbrat Aýǵanov, Parlament Senatynyń depýtaty Rýslan Rústemov, qoǵam ókilderi qatysty.
«О́skeleń urpaq osy ortalyq arqyly óńirdiń tarıhyn, mádenıetin tereńinen tanıdy dep senemiz. Munda árbir jádiger – rýhanı baılyǵymyzdyń dáleli, ótken men búginniń altyn kópiri. «Samuryq-Qazyna» qory keıingi 4 jylda Qyzylorda oblysynda 13 áleýmettik jobany qoldady. О́tken jyly Ústel tennısi ortalyǵyn ashtyq. «Qamqorlyq» ońaltý ortalyǵy jumys isteıdi. Bıyl jyl sońyna deıin balalarǵa arnalǵan ońaltý ortalyǵyn ashamyz. Barshańyzdy mańyzdy mádenı jáne tarıhı ortalyqtyń ashylýymen quttyqtaımyn», dedi Ǵıbrat Aýǵanov.
Jańa ǵımarattyń aýdany 1953 jyly salynǵan burynǵy ólketaný mýzeıiniń aýmaǵynan eki ese úlken. Zamanaýı mýzeı ǵımaratynda 250 myńnan astam jádigerdi saqtaýǵa bolady. Bul – qazirgi oblystyq mýzeı qorynan 3,5 ese úlken.
Murajaı ekspozısııalary 12 zalda ornalasqan. Onda óńir men el tarıhynyń negizgi kezeńderi qamtylǵan. Mysaly, paleontologııa, arheologııa zaldary, Qazaq handyǵy dáýiri, etnografııa, Qyzylorda óńiriniń tarıhy, Alashorda murasy, Ekinshi dúnıejúzilik soǵys, mádenıet pen óner, áleýmettik-ekonomıkalyq damý, ǵarysh taqyryby, elimiz táýelsizdiginiń qalyptasýyna arnalǵan zaldar bar. Ekspozısııany jan-jaqty zertteý maqsatynda mýzeıde zamanaýı sıfrlyq tehnologııalar engizilgen: jasandy ıntellekt júıesi, panoramalyq, dıoramalyq ınstallıasııalar, ınteraktıvti LED ekrandar ekskýrsııany kórneki ári qyzyqty etedi.
Jańa ortalyq – Qyzylordanyń mádenı áleýetin aıqyndaıtyn zamanaýı platformaǵa aınalmaq. Bul – tek ótkendi eske alý alańy ǵana emes, óskeleń urpaqqa otansúıgishtik pen tarıhı tanym darytatyn, bolashaqqa senim uıalatatyn rýhanı orda.
Qomaqty ınvestısııa, naqty nátıje
Keıingi bes jylda «Samruk-Kazyna Trust» qory Qyzylorda oblysynda jalpy quny 1,8 mlrd teńgege 13 áleýmettik jobany júzege asyrdy. Jobalardyń qatarynda byltyr qazan aıynda ashylǵan Ústel tennısi ortalyǵy bar.
Syrdarııa ózeniniń sol jaǵalaýynda ornalasqan, zamanaýı talaptarǵa saı salynǵan bul keshenniń aýmaǵy – 3652 sharshy metr, eki qabatty ǵımaratta 16 ústel, 350 kórermenge arnalǵan trıbýna qarastyrylǵan. Búginde 5 jattyqtyrýshy 300-ge jýyq jasóspirimdi ústel tennısimen kásibı túrde aınalysýǵa baýlyp keledi. Jarty jyldyń ishinde ortalyqtyń 18 sportshysy 1-sporttyq razrıad ıesi atanyp, jas órender respýblıkalyq deńgeıdegi jarystarda jeńis tuǵyrynan kórinip júr.
Urpaqqa bilim, ultqa birlik syılaǵan joba
Sonymen qatar byltyr qazan aıynda qordyń «Jaıly mektep» ulttyq jobasy aıasyndaǵy alǵashqy zamanaýı oqý orny qoldanysqa berildi. 900 oqýshyǵa arnalǵan mektep qazirgi zaman talaptaryna tolyq saı. Jalpy, joba sheńberinde óńirde 12 300 oryndyq 21 mektep salý kózdelip, búginde alǵashqy tórt mektep oqýshylarǵa esigin aıqara ashty.
Budan bólek, qordyń aýtızmi bar balalarǵa erekshe nazar aýdaratyn áleýmettik saıasaty aıasynda óńirde erte aralasý ortalyǵy ashylyp, ondaǵy sábıler men olardyń otbasylaryna keshendi kómek kórsetiledi.
1 mamyr — Qazaqstan halqynyń birligi kúnine oraı Qyzylorda qalasynda «Samuryq-Qazyna» kompanııalary tobynyń qoldaýymen «Dostyq úıiniń» jańa ǵımaratynyń irgetasy qalandy. Jalpy quny 3,8 mlrd teńge bolatyn bul zamanaýı nysan etnomádenı birlestikterge arnalǵan tolyq jabdyqtalǵan ortalyqqa aınalady.
Aıgerim AQShOLAQOVA
