Aqparattar aǵyny

 Sońǵy aıda Qazaqstanda ónerkásip jáne azyq-túlik ónimderiniń baǵasy arzandady. Statıstıka komıtetiniń málimetinshe, 2015 jylǵy shildede maýsym aıymen salystyrǵanda, taý-ken ónerkásibindegi baǵalar 1,5 paıyzǵa, óńdeý ónerkásibindegi baǵalar 0,7 paıyzǵa arzandady. О́ndiristik ónimder baǵasy 1,2 paıyzǵa tómendedi, al óndiristik sıpattaǵy qyzmetter baǵasy 1,2 paıyzǵa qymbattady.  Bas prokýratýra quqyq qorǵaý organdaryn reformalaý máseleleri jónindegi ınternet-saıtty iske qosty. Endi atalǵan saıt Memleket basshysy jarııalaǵan bes ınstıtýttyq reformalardy jáne «100 naqty qadam» Ult josparyn júzege asyrý boıynsha maqsatty túrde jumys júrgizetin bolady. Iske qosylǵan portalǵa (www. pro.kz) kez kelgen azamat quqyq qorǵaý júıesin reformalaý jáne zańnamany jetildirý boıynsha óz usynystaryn qaldyra alady.  Astanadaǵy «Saranda» shaǵyn aýdanynda 240 oryndyq balalar baqshasy ashyldy. Bilim salasynyń mamandary bul qaladaǵy balabaqsha kezegin azaıtady degendi aıtýda. Jańa ortalyqtyń basty ereksheligi, ǵımarat edeni arqyly jylytylady. Sondaı-aq, shkaftarda kıimder men aıaqkıimderdi keptirýge bolady.  Almaty oblysyndaǵy iri kondıterlik kompanııa – «Almaty ónimi» aıyna 800 tonnaǵa deıin tátti ónim shyǵarýǵa kiristi. Qazir mundaǵy eki sehta 480 adam jumys isteıdi. Kásiporyn tátti taǵam túrin óndiretin Ortalyq Azııadaǵy eń iri zaýyt bolyp esepteledi.  Qaraǵandy oblysynyń taýar óndirýshileri EKSPO nysandary qurylysy boıynsha jasalǵan kelisimsharttar somasyn 6 mlrd.-tan astam teńgege jetkizdi. Oblystyq ónerkásip jáne ındýstrııalyq-ınnovasııalyq damytý basqarmasynyń habarlaýynsha, EKSPO-2017 nysandaryn salatyn merdiger kompanııalar aımaqtaǵy 12 kásiporynmen 15 kelisimshartqa qol qoıǵan.  Pavlodar oblysynyń Jelezınka aýdanynda aǵash óńdeıtin jańa kombınat iske qosyldy. Munda tek qaıyń aǵashy óńdeledi. Kombınattyń ashylýy shaǵyn aýyldyń tamyryna qan júgirtkendeı áser berip otyr. Qazirgi kúni 37 turǵyn turaqty jumyspen qamtyldy.  Petropavl áýejaıynda ushý-qoný alańdaryn jóndeý jumystary bastaldy. Onda ushý-qoný jolaǵyn qalyńdyǵy 10 sm bolatyn asfaltty betonmen jabý, ony 300 metrge uzartý, 18 metrge keńeıtý, sonymen qatar, ushý joly men perrondy qalypqa keltirý jumystary júrgiziledi. Osyǵan oraı, qurylys aıaqtalǵanǵa deıin bul áýejaı arqyly ushý-qoný toqtatyldy. Habarlar Úkimet, oblystyq ákimdikter saıttary, «QazAqparat» agenttigi jáne «24kz» telearnasynyń derekteri boıynsha daıyndaldy.