Aıryqsha jobany uıymdastyrýǵa «Serpindi damý alıansy» men Ońtústik Oral memlekettik tarıhı mýzeıi de ún qosqan. «Anatolıı Býkreev: Shyńǵa órleý» dep atalǵan kórme – birneshe aýqymdy taqyrypty qamtydy. Aty ańyzǵa aınalǵan alpınıst – Elbrýs shyńyn 1 saǵat 47 mınýtta baǵyndyrǵan (1990 j.) jáne Qazaqstannyń Tuńǵysh Prezıdentin Abaı shyńyna alyp shyqqan (1995 j.) tarıhtaǵy jalǵyz alpınıst.
Taǵylymdy sharada kórermen nazaryna Anatolıı Býkreevtiń jeke muraǵatynan alynǵan 100-ge jýyq sırek fotosýret, qujattar, marapattar men jeke kúndelikter usynyldy. Bul materıaldar onyń sportshy, alpınızm sheberi retinde qalyptasýyn, otbasyn, oqý jyldaryn, halyqaralyq dárejedegi sport sheberi retindegi murasyn jáne jetistikterin aıqyn kórsetedi. Ol – Jer sharyndaǵy 14 segizmyńdyq shyńnyń 11-in baǵyndyrǵan tulǵa.
Kórmede sonymen qatar sýretshi ári sáýletshi Andreı Starkovtyń Anatolıı Býkreevke arnalǵan 18 óner týyndysy qoıyldy. Olardyń qatarynda «Tıangboche monastyrinen qaraǵandaǵy Everest kórinisi», «Han-Táńiri – Rýhtar ámirshisi», «Abaı shyńy – keshki tuman ishinde», «Amangeldi shyńy» jáne basqa da kartınalar bar.
Kórmeni ashqan Memlekettik ortalyq mýzeı dırektorynyń mindetin atqarýshy Serjan Sarov, artyna óshpes iz qaldyrǵan daryndy sportshynyń ómir-belesteri osy salaǵa qyzyqqan jastarǵa jarqyn úlgi ekenin aıtty. Is-shara barysynda qazaqstandyq alpınıst, jýrnalıst Galına Mýlenkova sóz sóılep, kórme keıipkeri týraly ózi túsirgen fılmderdi tilge tıek etti. Al kórme uıymdastyrýshysy Andreı Býkreev pen sýretshi, Býkreevtiń sońǵy ekspedısııasyna qatysqan Andreı Starkov alpınısttiń qaharmandyq jolyn baıandady.
Sharaǵa taý týrızmi salasynyń ókilderi, Anatolıı Býkreevtiń úzeńgiles dostary men onyń jarqyn beınesin qurmetteıtin azamattar qatysty.
