Foto: Ashyq derekkóz
Sharýalar sý tapshylyǵyn sezinbeı, egistikke der kezinde sý jetkizilgenin aıtyp, Sý resýrstary jáne ırrıgasııa mınıstrligine jáne «Qazsýshar» mekemesiniń jergilikti fılıalyna alǵys aıtty.
«Bıyl ekken qarbyz ben qyzanaq pisýge jaqyn. Osynsha alqapqa ýaqytyly sý jetkizip otyrǵan «Qazsýshar» fılıalyna alǵys bildiremiz. Bıylǵy alǵashqy qarbyzymyzdy jóneltýge daıynbyz. Sý jaqsy berilgendikten qarbyz sýdy kóp sińirip, jaqsy ósti. «Qazsýsharmen» kelisimshartqa da otyrdyq», dedi Túrkistan oblysy Jetisaı aýdany Tyń aýylynyń dıqany Qýanbaı Beksultan.«Búgin mine qarbyz artyp jatyrmyz. Ekken qarbyzymyz, kókónisimiz sýdan taryqqan joq. Sýdy jetkizip berip, qazý qajet bolǵan jerdi qazyp berip, kómek kórsetip otyrǵan aýdanymyzdyń «Qazsýshar» fılıalyna raqmet», dedi Atameken aýylynyń dıqany Teltaı Turǵynbek.
Bıyl sýarý maýsymynda ońtústik óńirlerdegi «Qazsýshar» fılıaldary dıqandarǵa 2,5 mlrd tekshe metrden astam sý bergen. Onyń ishinde 1,3 mlrd tekshe metri Túrkistan oblysyna bólinip, 276 myń gektarǵa jýyq egis alqaptary sýarylǵan.
Jetisaı aýdany boıynsha 84,3 myń gektar jerge 304 mln tekshe metr sý berilse, onyń 97,5 mln tekshe metri baqsha men kókónis alqaptaryn sýarýǵa baǵyttalǵan.
«Aýa raıynyń qolaılylyǵy men sý resýrstarynyń der kezinde berilýi – óńir dıqandaryna sáýir aıynda-aq qyryqqabattyń alǵashqy ónimin, al mamyrdyń sońynda qaýyn jınaýǵa múmkindik berdi», dep habarlady Sý resýrstary jáne ırrıgasııa mınıstrligi.
