Bul joly buqaralyq aqparat quraldary ókilderiniń aldyna «SOS Qazaqstannyń Balalar aýyly» korporatıvtik qorynyń dırektory Batyrhan Jenalaev, «SOS Astananyń balalar aýyly» baǵdarlamasynyń dırektory Záýresh Arystanova jáne QR BǴM Balalar quqyǵyn qorǵaý komıtetiniń bas sarapshysy Gúlmıra Qulsarıeva shyqty. Reti kelgende aıta ketý kerek, «SOS balalar aýyly» 132 elde bolsa, Qazaqstan onyń quramyna 1993 jyldan bastap kirgen. Qazirgi tańda balalar aýyldary Astana, Almaty jáne Temirtaý qalalarynda jumys isteýde. Balalar quqyǵyn qorǵaý komıtetiniń bas sarapshysynyń sózine qaraǵanda, jalpy elimizde búgingi tańda balalar máselelerimen aınalysatyn 400-ge tarta ártúrli qoǵamdyq birlestik tirkelgen. Balalar quqyǵyn qorǵaý komıteti janynan úkimettik emes uıymdardyń úılestirý keńesi de jumys isteıdi. Onyń quramyna 37 ÚEU kirip otyr.
Sondaı-aq, bul qoǵamdyq birlestikter kámelet jasyna jetpegender isteri jáne olardyń quqyǵyn qorǵaý jónindegi vedomstvoaralyq komıssııa quramynda ekendigin de aıta ketken jón. Atalǵan organ Úkimet janynan qurylǵan, barlyq úkimettik emes uıymdarmen memorandýmdarǵa qol qoıylǵan. «Eýrazııa – Ortalyq Azııa» qory arqyly balalar úıinen shyqqandardyń ómirge beıimdiligi jónindegi áleýmettik zertteýler oryn alǵandyǵy da atalmaı qalmady. Sonymen qatar, «Zııatkerlik eńbek odaǵy» qoǵamdyq birlestigi tarapynan balalar eńbegin qanaýǵa jol bermeý maqsatynda jyl saıyn «Bala eńbegimen kúrestiń 12 kúni» ulttyq kampanııasy júrgizilip keledi. «Áıelder lıgasynyń shyǵarmashylyq bastamasy» qoǵamdyq birlestigimen otbasyny qoldaý baǵdarlamasy da júzege asyrylýda eken. «SOS Qazaqstannyń Balalar aýyly» korporatıvtik qorynyń dırektory Batyrhan Jenalaevtyń aıtýynsha, balalarǵa qarsy zorlyq-zombylyq pen qatygezdik máselesi álemde ótkir tur. Mundaı problema tek memleketke ǵana qatysty emes, sonymen qatar, qoǵamdy da tolǵandyrar másele. Sondyqtan da úkimettik emes uıymdar men kommersııalyq emes sektorǵa úlken úmit artylyp otyr.
Sóz reti kelgende, qor dırektory ózi basqaratyn qordyń halyqaralyq uıym quramyna kirgenimen, qazaqstandyq balalardyń bolashaǵy úshin jumys jasap jatqandyǵyn alǵa tartty. Ol atalǵan qordyń 1993 jyly qurylǵandyǵyn, al 1997 jyldan Almaty qalasyndaǵy alǵashqy balalar aýyly ashylǵanyn, búginde olardaǵy balalar sany 67-den 1200-ge deıin kóbeıgendigin atap ótti. Endi bul balalar 22 joba men baǵdarlamalar arqyly qorǵalýda eken. Onyń sózine qaraǵanda, balalardy qorǵaýǵa arnalǵan birqatar zańdar da qabyldanǵan. Al «SOS Astananyń balalar aýyly» baǵdarlamasynyń dırektory Záýresh Arystanova óz kezeginde balalar aýyly men úılerinde oryn alyp jatqan jaǵdaılardyń barlyǵyna monıtorıng júrgiziletinin, balalarǵa kórsetilgen zorlyq-zombylyqtar men qatygezdikterge qatysty málimetter bazasy bar ekendigin de ortaǵa sala ketti. Elordadaǵy balalarǵa qatysty zorlyq-zombylyq máselesi báseń tartqanyn jetkizgen Z.Arystanova mundaı keleńsizdikter turmysy nashar otbasylarda jıi kórinis beretinine nazar aýdardy. Sondyqtan osyndaı zorlyq-zombylyqtardyń aldyn alý úshin kóptegen sharýalardy atqarý máselesi kútip tur.
Asqar TURAPBAIULY,
«Egemen Qazaqstan».
