Forým Qazaqstan men Qytaıdyń týrızm ındýstrııasy ókilderi arasyndaǵy ózara tıimdi yntymaqtastyqty nyǵaıtýǵa baǵyttalǵan. Oǵan eki eldiń jetekshi sarapshylary, týroperatorlary, qonaq úı bıznesi men Ctrip, Tongcheng, JD Travel tárizdi iri tehnologııalyq kompanııalarynyń ókilderi qatysty.
Forým aıasynda «Kazakh Tourism» men «Zowoyoo» kompanııalary yntymaqtastyq týraly memorandýmǵa qol qoıdy. Qujat Qazaqstannyń týrıstik áleýetin Qytaı naryǵynda sıfrlyq formatta dáripteýge, Qytaıdan týrısterdi belsendi tartýǵa baǵyttalǵan.
«Zowoyoo Qytaı qoldanýshylarynyń sıfrlyq minez-qulqyn jaqsy túsinedi. Bul bizge jańa býyn týrısteriniń talǵamy qalyptasatyn negizgi platformalarda barynsha jeke strategııa qurýǵa múmkindik beredi. Osylaısha biz árbir saıahatshyǵa beıimdelgen tájirıbe usynyp, olardyń sapardy josparlaýyn edáýir jeńildetemiz. Qytaılyq seriktespen josparlanǵan birlesken bastamalardy iske asyrý bıýdjettik qarjylandyrýdy qajet etpeıtinin atap ótkim keledi», - dep atap ótti «Kazakh Tourism» UK» AQ Basqarma tóraǵasynyń orynbasary Danıel Serjanuly.
Jospar boıynsha taraptar aspan asty elindegi saıahatshylarǵa beıimdelgen zamanaýı sıfrlyq ekojúıeni damytady. Seriktestik aıasynda Qazaqstandy Qytaıdaǵy Douyin (TikTok-tyń balamasy), Xiaohongshu (Little Red Book) tárizdi tanymal platformalarda jáne basqa medıaarnalarda usynylýyn keńeıtý qarastyrylǵan.
Qytaı delegasııasyna elimizdiń týrıstik áleýeti tanystyrylyp, týrızm salasyndaǵy yntymaqtastyqty keńeıtý múmkindikteri talqylandy. Paneldik sessııalar barysynda eki negizgi taqyryp kóterildi: týrızm ekojúıesiniń sıfrlyq transformasııasy jáne zamanaýı medıalar arqyly marketıngtik ilgeriletý.
Forým eki el arasyndaǵy týrızm men mádenı baılanystardy damytýǵa arnalǵan mańyzdy dıalog alańyna aınaldy.
ALMATY
