Ekologııa jáne tabıǵı resýrstar mınıstrligi Orman sharýashylyǵy jáne janýarlar álemi komıtetiniń málimetinshe, kertaǵylar Praga zoobaǵy men Majarstannyń «Hortobad» ulttyq saıabaǵynan ákelingen. Janýarlar birden «Altyn dala» memlekettik tabıǵı rezervatynyń aýmaǵyndaǵy jabaıy tuıaqtylardy jersindirý ortalyǵyna jetkizildi. Kerqulandar rezervattaǵy keń qasharlarda bir jyl ustalady. Odan keıin saıyn dalaǵa erkine jiberiledi. Atalǵan ortalyqta jaıly ınfraqurylym, jabaıy jylqylarǵa qaraıtyn arnaıy mamandar bar.
«Bul – bizdiń bir jyl boıy júrgizgen jumysymyzdyń nátıjesi. Kerqulandardyń taǵy bir toby aman-esen kelip jetti. Al birinshi ákelingen kerqulandar Torǵaı dalasyna ábden úırenip, jersindi desek bolady. Olar qazir «Altyn dala» memlekettik rezervaty ınspektorlarynyń qorǵaýymen jabaıy tabıǵat aıasynda tirshilik etip jatyr», deıdi Orman sharýashylyǵy jáne janýarlar álemi komıtetiniń tóraǵasy Danııar Turǵambaev.
Praga zoobaǵy Chehııa áýe kúshteriniń kómegimen Qazaqstanǵa osymen ekinshi ret kertaǵy jetkizilip otyr.
«Eýropalyq zoobaqtardan ákelingen bul janýarlar jabaıy tabıǵat aıasyndaǵy jergilikti popýlıasııanyń qalyptasýyna negiz salady degen oıdamyz. Torǵaı dalasynda tirshilik etýge ábden beıimdelgen genetıkalyq alýan túrli popýlıasııa qalyptaspaıynsha, bul asa kúrdeli jobany jalǵastyra beremiz», deıdi Praga zoobaǵynyń dırektory Mıroslav Bobek.
Veterınarlyq baqylaý jáne qadaǵalaý komıteti Arqalyq qalalyq aýmaqtyq ınspeksııasynyń basshysy Marǵulan Qoıshanulynyń aıtýynsha, birinshi bort Majarstannan 4 kerqulan, ekinshi bort Chehııadan 3 kerqulan jetkizgen.
«Bıylǵa barlyǵy osy 7 qulan, keler jyly taǵy 8 qulan ákelinedi. Osylaısha, 2029 jylǵa deıin atalǵan eki elden bizge bort kelip turady. Kerqulandar jazyq dalaǵa jiberiledi. «Altyn dala» memlekettik tabıǵı rezervatynyń mamandary qazir burynyraqta ákelingen kerqulandardyń analyqtary men atalyqtaryn qosyp jatyr. Buǵan deıin 2024 jyldyń maýsym aıynda jetkizilgen qulandardyń bári din aman. Veterınarııalyq baqylaý jasap, bárin qabyldap aldyq. Bul qulandar endi bir aıǵa deıin karantınde turatyn bolady», deıdi ınspeksııa basshysy.
Mamandardyń aıtýynsha, kerqulan (kertaǵy) – jer betinde qalǵan jabaıy jylqylardyń eń aqyrǵy túri. Jabaıy tabıǵat aıasynda XX ǵasyrdyń ortasyna qaraı joıylyp ketken. 2029 jylǵa deıin Torǵaı dalasynda kertaǵynyń odan ári kóbeıip, turaqty popýlıasııa túzýi úshin taǵy 40-45 bas jylqy ákelý josparda bar.
Qostanaı oblysy
