«BalaTurkvizyon» halyqaralyq ulttyq án baıqaýynyń Kókshetaýdaǵy 13-shi aımaqtyq irikteý týry óte tartysty ótti. Baıqaýǵa qalalar men eldi mekenderdegi balalardyń ártúrli shyǵarmashylyq ujymdary qatysty.
– Kókshe men Arqa óńiri qashannan án men jyrdyń uıyp turǵan ólkesi, – dedi bizben áńgimesinde baıqaýdyń tóreshiler alqasynyń tóraǵasy ári prodıýseri Kental. – Álııa Nazarbaevanyń «Jandaný álemi» qory ıgi bastamaǵa uıytqy boldy. Maqsat – án jáne sahna salasyndaǵy daryndy balalardyń jolyn ashyp, búldirshin balalarǵa arnalǵan qazaqsha 16 ánniń tusaýyn kesý. Bul oraıda menimen birge Kókshetaýǵa kelgen Medeý Arynbaev, Kenjebek Janábilov syndy belgili ánshi, sazgerler talǵam bıiginen kóringen talapkerlerge qoldaý kórsetpek.
Baıqaý barysynda Stepnogor qalasyndaǵy «Presto» mýzykalyq stýdııasynyń, Atbasar aýdanyndaǵy «Aıdana» halyqtyq án-bı ansambliniń ónerine rızashylyq bildirildi. Áıtkenmen, juldyzdy tóreshiler alqasy Shortandy aýdanynan kelgen on úsh jasar ánshi Aıman Amannyń shyǵarmashylyǵyna joǵary baǵa berip, balaýsa ónerpazdy respýblıkalyq baıqaýdyń jartylaı fınalynda baq synaýyna múmkindik berdi. Arnaıy mýzykalyq bilimi joq bolsa da Aıman qyz óziniń bulbul únimen qazaq, orys jáne fransýz tilderindegi ánderdi quıqyljyta shyrqady. Ol endi úlken qaladaǵy «Juldyzdy úıde» daıyndyq jumystaryna kirispek. Al 16-17 qyrkúıek kúnderi kásibı tóreshiler alqasy men telekórermender Ystambuldaǵy I Halyqaralyq «BalaTurkvizyon» án baıqaýynyń Grand-fınalynda el namysyn qorǵaıtyn balaýsa ónerpazdyń atyn ataıtyn bolady. Bul oraıda, aqmolalyqtar Aıman Amanǵa aıryqsha úmit artady.
Baqbergen AMALBEK, «Egemen Qazaqstan».
Aqmola oblysy.
