Sýretti túsirgen – Aqádil Rysmahan
Jergilikti atqarýshy bılik ókilderi keltirgen derekke júginsek, ındýstrııalyq jobany qarjylandyrýǵa jergilikti kásipker táýekel etken eken. Ol osy jobany sátimen júzege asyrý úshin ynty-shyntysymen iske kirisip ketti.
Oblys ortalyǵy Taraz qalasynan taıaqtastam jerde ornalasqan jańa zaýyttyń quryltaıshysy Jamalhan Ibragımovtiń aıtýynsha, shyńdalǵan shyny shyǵaratyn kásiporyn jergilikti 40 azamatty turaqty jumys ornymen qamtyp otyr. Bastapqyda 1 mlrd teńge kóleminde ınvestısııa salynǵan zaýyt jylyna 100 myń sharshy metr shyńdalǵan shyny óndirýge qaýqarly. Kásiporyn ónimine jergilikti tutynýshylar ǵana emes, kórshiles óńirlerdiń azamattary da qyzyǵýshylyq tanytqan.
«Memleket basshysy Qasym-Jomart Toqaevtyń ınvestısııalyq jobalardy qoldaý arqyly óńirlerde jańa óndiris oryndaryn qurý jónindegi tapsyrmasy nazarymyzdan tys qalmaq emes. Qazirgi kezde oblys aýmaǵynda jańa kásiporyndar ashý boıynsha qarqyndy jumys júrgizilip jatyr.
Birneshe kún buryn toǵyz joldyń torabynda ornalasqan Shý qalasynda jylyna 1 500 lokomotıv jóndeýge áleýeti jetetin tehnıkalyq qyzmet kórsetý deposy ashyldy. Prezıdent tapsyrmasyn júzege asyrý maqsatynda qolǵa alynǵan jumys az emes. Jańa jobalardyń barlyǵyn sátimen oryndaý úshin jergilikti atqarýshy bılik ókilderi qoldan kelgenshe eńbek etip jatyr.
Búgin iske qosylǵan shyńdalǵan shyny óndiretin zaýyt – óńirde atqarylyp jatqan aýqymdy jumystyń naqty bir kórinisi. Bul kásiporyn – óńir ekonomıkasynyń órkendeýine, jergilikti halyqtyń áleýmettik jaǵdaıyn jaqsartýǵa baǵyttalǵan mańyzdy jobalardyń biri.
«Týǵan jerge týyńdy tik» degen halyq danalyǵynyń máni tereńde jatyr. Osy qaǵıdany ustanyp, týǵan jerge ınvestısııa salyp, jańa is bastaǵan isker azamattarǵa alǵystan basqa aıtarymyz joq. О́ndiris oshaǵyn ashqan azamattardyń bastamasy baıandy bolatynyna senimimiz zor», deıdi óńir basshysy Erbol Qarashókeev.
Resmı derekke súıensek, jobany «Js Glass» JShS júzege asyrypty. Zaýyt basshylary óndirilgen ónimniń sapasy men qaýipsizdik talaptaryna aıryqsha nazar aýdaryp otyr. Sondaı-aq quryltaıshylar kásiporyn ónimin, ishki naryqty qamtyp qana qoımaı, kórshiles jatqan Almaty, Túrkistan oblystarynyń naryǵyna shyǵarýdy da josparlap otyr.
«Kásiporyn qyzmetkerleri zamanaýı úlgidegi qondyrǵylarmen jumys isteıdi. Qytaı elinen kelgen kásibı mamandar bir aı boıy bilgenin úıretti. Sonyń arqasynda biz de jańa qurylǵylardy bir kisideı meńgerip aldyq. Aýylymyzda jańa zaýyttyń ashylǵany kóńil qýantady. Endi tek adal jumys istep, óńir ekonomıkasynyń órkendeýine kúsh salýymyz kerek», deıdi shyńdalǵan shyny shyǵaratyn zaýyt qyzmetkeri Dastan Abdelıev.
Jalpy alǵanda, Jambyl oblysynda ilkimdi jobalardy júzege asyrý boıynsha birshama jumys atqarylyp jatyr. Iri jobalardy kezeń-kezeńimen iske asyrý maqsatynda qolǵa alynǵan jumys ilki sátke de toqtamaq emes.
Oblystyq kásipkerlik jáne ındýstrıaldy-ınnovasııalyq damytý basqarmasynyń basshysy Aspandııar Seısebaevtyń aıtýynsha, bıyl «Alit Holding» JShS jyldyq qýaty 150 myń tonnany quraıtyn qurǵaq qurylys qospalaryn óndiretin kásiporyndy iske qosýǵa nıettenip otyr. Sondaı-aq «Knaýf Gıps Taraz» JShS jylyna 22 mıllıon sharshy metr gıpsokarton óndiretin kásiporyn qurylysyn bastamaq.
Budan bólek, «Qazaq soda» kompanııasy jylyna 1 mıllıon tonna kalsıılendirilgen soda óndiretin zaýyt qurylysyn júrgizip jatyr. О́ndiris oshaǵy 2027 jyly iske qosylady. Sonymen qatar «Talas Investment Company» kompanııasynyń
natrıı sıanıdin óndirý jobasynyń ekinshi kezeńi júzege asatyn kún de alys emes. Sol arqyly jylyna 30 myń tonna natrıı sıanıdin óndirý múmkin bolmaq.
Qalaı desek te, óńirde ınnovasııalyq jobalardy iske asyrý jóninde atqarylyp jatqan jumys az emes. Biz solardyń bir parasyn ǵana tilge tıek etip otyrmyz. Jergilikti atqarýshy bılik ókilderi Prezıdent tapsyrmasyn laıyqty oryndaý arqyly jergilikti halyqty jańa jumys ornymen qamtýǵa basymdyq berip otyr.
Jambyl oblysy,
Baızaq aýdany
