Otyrys barysynda Aıda Balaeva mádenı-gýmanıtarlyq yntymaqtastyq salasyndaǵy josparlar týraly kelisip, bul sharalar ózara baılanysty nyǵaıtýǵa yqpal etetinin atap ótti.
Kezdesýde taraptar aldaǵy birlesken is-sharalardy talqylady. Atap aıtqanda, elimizde Belarýs mádenıetiniń kúnderin ótkizý týraly bastama kóterildi. Aıda Balaeva bul is-sharanyń aıasyn keńeıtip, dástúrli konsertter men kórmelerden bólek, sheberlik sabaqtaryn, shyǵarmashylyq kezdesýlerdi, ǵylymı konferensııalardy, mádenıet salasyndaǵy ózara baılanystyń ózge de túrlerin qamtýdy usyndy.
Sonymen qatar, «Listapad» kınofestıvali aıasynda Qazaqstan kınosynyń kúnderi ótedi. Qazirgi ýaqytta is-sharany ótkizýge qatysty máseleler men kórsetiletin fılmderdiń tizimi naqtylanyp jatyr. Budan bólek, 10-11 shilde kúnderi Vıtebsk qalasynda ótetin halyqaralyq «Slavıan bazary» festıvaline de qazaqstandyq ónerpazdar qatysady.
Kezdesý sońynda Aıda Balaeva Qazaqstan tarapy eki eldiń mýzeı, teatr men arhıv qyzmetteri arasyndaǵy yntymaqtastyqty nyǵaıtýǵa, sondaı-aq birlesken kınoóndiris pen konserttik jobalardy damytýǵa múddeli ekenin atap ótti. Taraptar birlesken is-sharalardy úılestirý maqsatynda jumys tobyn qurýǵa ýaǵdalasty. Kezdesý qatysýshylarynyń pikirinshe, bul bastamalar Qazaqstan men Belarýs elderi arasyndaǵy dostyq pen ózara túsinistikti nyǵaıta túspek.
