Parlamentaralyq baılanystyń baıypty kezeńi

Jogorký Kenesh delegasııasyn qarsy alǵan Májilis spıkeri qazaq pen qyrǵyz halyqtaryn ejelden ortaq tarıhy, uqsas tili, salt-dástúri men má­denıeti biriktiretinin atap ótti. Al eki el arasyndaǵy dostyq pen tatý kórshilik qa­rym-qatynastyń tamyry tereńde jatyr.

– Qasym-Jomart Toqaev pen Sadyr Japarovtyń salıqaly saıasatynyń, ózara túsinistik pen dostyǵynyń arqasynda búginde eki el arasyndaǵy yntymaqtastyq óte qarqyndy damyp keledi. Bizdiń kóshbasshylarymyzdyń ekijaqty kezdesýleriniń qarqyndylyǵy parlamentaralyq baılanystardyń jıiligine de tikeleı áser etedi. Bizdiń endigi maqsatymyz – osy ekpindi saqtap, odan ári nyǵaıtý, – dedi E.Qoshanov.

Májilis spıkeri Prezıdentter yqpaldastyqtyń basym baǵyttaryn aıqyndap, olardy júzege asyrý úshin naqty mindetter júktegenin basa aıtty. Onyń negizgileriniń biri – 2030 jylǵa qaraı eki el arasyndaǵy taýar aı­nalymyn 3 mlrd dollarǵa deıin jetkizý. Májilis eki apta buryn ratı­fı­ka­sııalaǵan Qazaqstan men Qyr­ǵyzstan arasyndaǵy odaqtastyq qatynastardy tereńdetý jáne keńeıtý týraly shartta yntymaqtastyqtyń jańa ınstıtýsıonaldyq negizderi aıqyn kórsetilgen.

– Bul aýqymdy qujat parlament­aralyq baılanysty nyǵaıtý úshin jańa múmkindikter berip otyr. Bizdiń parlamentterge joǵary deńgeıde qol jetkizilgen ýaǵdalastyqtardyń iske asyrylýyn qadaǵalaý fýnksııasy júktelgen. Osy rette eki el úkimeti belsendi jumys istep jatqanyn atap ótken jón. О́z kezeginde bizdiń parlamentter olardy zańnamalyq turǵydan qoldaýdy qamtamasyz etip jatyr, – dedi E.Qoshanov.

Sondaı-aq ol qazaq-qyrǵyz qarym-qa­ty­nasynyń barlyq salasyn qamtı­tyn 150-den asa qujattan turatyn berik sharttyq-quqyqtyq bazasy qalyptas­qanyn aıtty. Olardyń ishindegi eń mańyz­dylary – Investısııalardy kótermeleý jáne ózara qorǵaý týraly kelisim, «Qarasý» jáne «Aq-Tilek» avtojol ótkizý pýnktteri mańynda ındýstrııalyq saýda-logıstıkalyq keshendi qurý jáne onyń qyzmetin retteý týraly kelisim.

О́z kezeginde Nýrlanbek Týrgýnbek ýýlý ekijaqty máselelerdi sheshýde Parlamentaralyq yntymaqtastyq keńesiniń rólin erekshe atap ótti.

– Búgingi Parlamentaralyq keńestiń otyrysy – jaı ǵana josparly kezdesý emes. Bul – eki jaqyn memlekettiń arasyndaǵy ashyq ári syndarly dıalogtiń jalǵasy. Osy turǵyda parlamenttik dıalogtiń orny erekshe. Parlamentter halyqtyń múddesin qorǵaıdy. Demek parlamentaralyq yntymaqtastyq arqyly ózara túsinistikti qoldap qana qoımaı, ony tereńdete alamyz. Birlesken is-áreketter arqyly ortaq múddelerdi halyqaralyq alańdarda qorǵaýǵa múmkindik jasaımyz, – dedi Jogorký Kenesh tóraǵasy.

Keńes otyrysy barysynda depýtattar saýda-ekonomıka jáne logıstıka salalaryndaǵy áriptestikti nyǵaıtý máselelerin ortaǵa saldy. Atap aıtqanda, Qazaqstan – Qyrǵyzstan shekarasyndaǵy Indýstrııalyq saýda-logıstıkalyq keshen qurylysyn odan ári júzege asyrý, shekaralyq baqylaý-ótkizý pýnktteriniń ınfraqurylymyn jaqsartý jumystaryn jandandyrý, sondaı-aq Almaty – Ystyqkól avtojolyn salý jobasy bar.

Sonymen qatar taraptar ekijaqty formatta jáne Ortalyq Azııa elderi áıelderiniń dıalogi, TúrkPA jáne basqa da halyqaralyq parlamenttik uıymdar aıasynda yntymaqtastyqty damytýdyń mańyzdylyǵyn atap ótti.

Otyrysta ınvestısııalyq, mádenı-gýmanıtarlyq yntymaqtastyq másele­leri, týrızm, ekologııa jáne klımat­tyń ózgerýi salalaryndaǵy jobalar da qarastyryldy. Májilis spıkeri Qyrǵyz­stannyń muzdyqtardy saqtaý jáne halyqaralyq taý dıalogin belsendi damytý jónindegi bastamalaryn qoldaıtynyn aıtyp, Halyqaralyq Araldy qutqarý qory aıasyndaǵy jumysty odan ári jalǵastyrýǵa shaqyrdy.

Sapar barysynda Jogorký Kenesh tóraǵasy Qazaqstan Respýblıkasy Prezıdenti teleradıokesheniniń qura­myna kiretin «Jibek Joly» respýb­lı­kalyq telearnasynda boldy. Nýr­lanbek Týrgýnbek ýýlýna teleradıo­kompanııanyń negizgi jumys baǵyttary men «Silk Way Central Asia» halyqaralyq medıa jobasy tanystyryldy. Jobanyń maqsaty – Ortalyq Azııada birtutas aqparattyq keńistik qalyptastyrý jáne jahandyq medıa alańda aımaq elderi­niń múddelerin ilgeriletý. «Silk Way» telearnasy alty tilde, sonyń ishinde qyrǵyz tilinde habar taratady. Habar taratý aýmaǵy 300 mln-nan asa áleýetti aýdıtorııasy bar 120 eldi qamtıdy. Aldaǵy ýaqytta Qyrǵyzstan, О́zbekstan, Túrikmenstan jáne Tájikstannyń ulttyq telekompanııalarymen kontent almasý jáne áriptestik qarym-qatynasty damytý josparlanyp otyr.

Sapar aıasynda parlamentter delegasııalary Qalıbek Qýanyshbaev atyndaǵy Qazaq ulttyq mýzykalyq-drama teatryna bardy. Qonaqtardyń nazaryna Shyńǵys Aıtmatovtyń áıgili shyǵarmasy boıynsha Qazaqstannyń halyq ártisi Talǵat Temenov qoıǵan «Qyzyl oramaldy shynarym» dramasy usynyldy.