Shymkentte kútýshi áıel urǵan sábı qaıtys boldy

ASTANA. 14 aqpan. Kútýshi áıel ólimshi etip urǵan 4 jasar qyz Shymkenttegi aýrýhanada esine kelmegen kúıi qaıtys boldy. Bul týraly «7 arna» habarlady. «Kútýshi áıel urdy dep boljanǵan 4 jasar qyz Shymkent aýrýhanasynda jantásilim etti. Onyń inisi de aýrýhanada jatyr», - dep málimdedi arna tilshisi. Shymkent qalasy Abaı aýdany prokýrorynyń orynbasary Ermek Áıtimovtiń aıtýynsha, náreste esin jınamaǵan kúıi qaıtys bolǵan. Ashyp kórý onyń mıyna qan quıylyp ketýi saldarynan qaıtys bolǵanyn anyqtaǵan. Eske sala keteıik, Ońtústik Qazaqstan oblysynyń ortalyǵynda eki kishkentaı balanyń qatty soqqy alyp, aýrýhanaǵa túskenderi osy aptanyń dúısenbi kúni belgili bolǵan. Aldymen komaǵa kirip ketken tórt jastaǵy qyz bala, sońynan onyń qatty dene jaraqatyn alǵan eki jastaǵy inisi jansaqtaý bólimine jatqyzyldy. Tekserý kezinde olardyń bastary men aıaq-qoldarynan qatty soqqy alǵandary anyqtaldy. Kúdikti retinde olardy birazdan beri kútimge alǵan kútýshi áıel qamaýǵa alyndy. Al balalardyń anasy birazdan beri basqa jaqta jumys istep júrgendikten, úıinde bolmaǵan. Ol balalaryn sońǵy ret Jańa jyldyń aldynda kóripti. Qurysh Nurymbet. Derek, foto: 7 arna.