Aqtóbede Ult josparyna arnalǵan jıyn ótti

AQTО́BE. 4 tamyz. «Nur Otan» halyqtyq demokratııalyq partııasy Aqtóbe oblystyq fılıalynyń ǵımaratynda Elbasynyń «100 naqty qadam» Ult josparyn júzege asyrýǵa baǵyttalǵan Parlament Senatynyń depýtaty, sot júıesi jáne quqyq qorǵaý organdarynyń konstıtýsııalyq zańnamasy jónindegi komıtetiniń múshesi Bektas Beknazarovtyń qatysýymen kóshpeli otyrys ótkizildi. Bul týraly egemen.kz tilshisi habarlady. Sharaǵa oblys ákiminiń orynbasary Ǵalı Esqalıev, oblystyq máslıhattyń hatshysy Sánııa Qaldyǵulova, oblystyq sottyń tóraǵasy Erlan Aıtjanov, sýdıalar, prokýratýra men advokatýra qyzmetkerleri jáne oblystyń quqyq qorǵaý organdarynyń ókilderi qatysty. Kóshpeli otyrysty oblystyq máslıhattyń hatshysy Sánııa Qaldyǵulova ashyp, ult josparynyń mańyzyna toqtaldy. Jıynda sóz alǵan Parlament Senatynyń depýtaty Bektas Beknazarov Memleket basshysynyń Ult jospary – «100 naqty qadam» bes ınstıtýsıonaldyq reformasyn júzege asyrý – bul jahandyq ishki syn-qaterlerge jaýap jáne jańa tarıhı jaǵdaılarda damyǵan 30 memlekettiń qataryna ený jónindegi baıandy baǵdarlama ekendigin atap ótti. «100 naqty qadam» Ult jospary Qazaqstan memlekettiligin nyǵaıtýǵa, týra joldan taımaýǵa, kúrdeli kezeńnen senimdi ótýge jaǵdaı týǵyzatyn jáne zań ústemdiligin qamtamasyz etetin bolady», – deı kelip, ol quqyq qorǵaý organdaryn reformalaýǵa baılanysty bolatyn ózgerister men jańalyqtardy qadamdar boıynsha jiliktep túsindirdi. Oblystyq sottyń tóraǵasy Erlan Aıtjanov «100 naqty qadam» Ult josparyn júzege asyrýdaǵy zań ústemdigin qamtamasyz etý máselesi jóninde baıandady. Sottyń ashyqtyǵy men jarııalylyǵyna qatysty atqarylǵan jumystardy tilge tıek etti. Onyń aıtýynsha, oblystyq sot beıne jáne aýdıo quraldarmen 70 paıyz qamtamasyz etilgen, bul óz kezeginde sot jumysynyń jarııalylyǵy men ashyqtyǵyna alǵyshart jasaıdy. Jıynǵa qatysýshylar Prezıdent usynǵan memlekettik qyzmetti, sot júıesin, quqyq qorǵaý qyzmetin reformalaý, sybaılas jemqorlyqpen kúresti kúsheıtý máseleleri jáne olardy tıimdi túrde júzege asyrý joldaryn talqylady. Elbasynyń «100 naqty qadam» Ult josparyndaǵy bes ınstıtýsıonaldyq reformany júzege asyrý elimizdiń árbir azamatyna jáne Qazaqstannyń ári qaraı bolashaǵyna qatysty bolǵandyqtan, bul baǵytta ortaq usynystar ortaǵa salyndy, olardy júzege asyrýdyń mehanızmderi de áńgime boldy. Senator Bektas Beknazarov oblys ortalyǵynda qoǵamdyq qabyldaý ótkizdi. Sodan keıin Alǵa jáne Hromtaý aýdanynyń aktıvimen kezdesip, Elbasynyń «100 naqty qadam» Ult josparyn júzege asyrýǵa baǵyttalǵan túsinik jumystaryn júrgizdi. Satybaldy Sáýirbaı. Derek, sýret: egemen.kz.