Assambleıa merziminen buryn prezıdent saılaýyn ótkizýdi usyndy

ASTANA. 14 aqpan. Qazaqstan halqy Assambleıasy bıyl merziminen buryn prezıdent saılaýy ótkizýdi usyndy. Bul týraly «Radıotochka» habarlady. Parlament Májilisine Qazaqstan halqy Assambleıasynan saılanǵan depýtat Ahmet Mýradov «Radıotochka» tilshisine Assambleıanyń prezıdent saılaýyn merziminen buryn ótkizý týraly bastama kóterip otyrǵanyn jetkizdi. «Búgin Qazaqstan halqy Assambleıasy keńesiniń otyrysy bolyp, onda burynǵy senator, qazirgi Assambleıa tóraǵasynyń orynbasary Anatolıı Bashmakov sóz sóıledi. О́z sózinde Anatolıı Afanasevıch keńestiń qoldaý bildirýimen Assambleıa atynan 2015 jyly kezekten tys, merziminen buryn Qazaqstan Respýblıkasy Prezıdentiniń saılaýyn ótkizý jóninde bastama engizdi. Úndeý keńestiń atynan qabyldanyp, daýys berildi», - dedi Ahmet Mýradov telefonmen agenttik tilshisine. «Bul neden týyndap otyr?», - degen suraq qoıyldy tilshi tarapynan. «Másele mynada, 2016 jyly Konstıtýsııaǵa sáıkes, Prezıdent pen Parlament saılaýlary ótýge tıis. Sol Konstıtýsııa boıynsha, bir jyldyń ishinde bul eki naýqandy qatar ótkizýge bolmaıdy. Bul – bir. Ekinshiden. Siz túsinesiz be, ony jurttyń bári bilip otyr, qazirgi tańda oqıǵalardyń qanshalyqty jyldam qarqynda damyp bara jatqany sondaı, 2016 jyly onyń «shyńyna» shyqqan kezde eki birdeı naýqandy ótkizý saılaýshylar úshin de, saıası júıe retinde memleket úshin de óte aýyr júk bolmaq», - dep túsindirdi Májilis depýtaty. Ahmet Mýradovtyń sózine qaraǵanda, Qazaqstan halqy Assambleıasy múshelerine mundaı sheshimdi ýaqyttyń ózi qabyldattyryp otyr. «Nursultan Ábishuly, baıqaısyzdar ma, ótken jyldan beri turaqty túrde udaıy ártúrli bastamalar kóterip keledi, osyǵan oraı Úkimet pen Parlament sınhrondy rejımmen jumys jasaýda. Bizdiń «Qazaqstan – 2050» Strategııamyz arqyly bolashaq boljanyp, ekonomıkalyq reformalarymyz, shaǵyn jáne orta bıznesti qoldaý, ınvestısııalyq klımatty jaqsartý jaılaryna qatysty máseleleri zańnamamen qarastyrylǵan «Nurly jol» atty jańa ekonomıkalyq saıasatty júzege asyrý qolǵa alyndy. Munyń bárin tabysty túrde júzege asyrý bir jaǵdaıda, biz qoǵamdyq kelisimdi, ulttyq birlikti, ult lıderi men halyq birligin qamtamasyz etkende ǵana múmkin bolady», - dep atap ótti ol. Depýtat budan ári Qazaqstan halqy Assambleıasynyń óz Tóraǵasy Nursultan Nazarbaevqa qoldaý kórsetetinine toqtaldy. Ol sondyqtan da tap osyndaı ınısıatıvamen jurt aldyna shyǵyp otyr. «Qalaı oılaısyz, sizderdiń usynystaryńyz qabyldana ma?» «Biz óz usynysymyzdyń qabyldanatynyna úmit artamyz. Munyń ústine, ol keńestiń shaǵyn sheńberinde ǵana qabyldana salǵan joq. Sheshim saılaýshylardyń, Assambleıa depýtattarynyń, bizdiń etnostyq toptarymyz músheleriniń kópten-kóp tilekteri men usynystary negizinde qabyldandy. Keń aýqymda alǵanda, Qazaqstan halqy Assambleıasy – Qazaqstannyń barlyq halqy eseptes. Bul tezısti eshkim joqqa shyǵara almaıdy», - dedi májilisshi. Ahmet Mýradovtyń pikirinshe, búgingi kúni elimizdiń basty strategııalyq josparlaryn júzege asyrýdyń sharttaryn jasap alýdyń mańyzy zor. «Biz sonymen birge osy kezde ózimizge syrttan da, ishten de ártúrli kóptegen yqpal etýshilik bar ekenin baıqap júrmiz. Sondyqtan biz qolda bar nárselerimizdiń bárin qazir alǵa qoıǵan mindetterimizdi esh alańsyz is júzine asyrý úshin bekemdep alýymyz kerek. О́zimizdiń basty strategııalyq baǵdarlamalarymyzdy júzege asyrý úshin ekonomıkalyq, saıası, kerek deseńiz, moraldyq-psıhologııalyq bazamyzdy jasap alýymyz kerek», - dep túıindedi depýtat. Sáken Maılybaı. Derek: Radıotochka.