Foto: ashyq derekkóz
Sot kúzetshini Qylmystyq kodekstiń 252-babynyń 1-bóligi — laýazymdyq ókilettigin asyra paıdalaný baby boıynsha kináli dep tanydy. Úkimge sáıkes, ol jyl saıyn 100 saǵattyq qoǵamdyq jumysqa tartylyp, eki jyl boıy kúzet salasynda jumys isteý quqyǵynan aıyryldy.
2024 jyldyń 11 qarashasynda Shymkenttegi qonaqúılerdiń birinen mas adamnyń qyzmetkerlerge kedergi keltirip jatqany týraly qońyraý túsken. Oqıǵa ornyna kelgen kúzetshilerdiń biri er adamdy syrtqa shyǵarmaq bolady. Kúzetshiniń aıtýynsha, jábirlenýshi ony balaǵattaǵan.
Sot materıaldaryna sáıkes, kúzetshi mas adamdy ǵımarat syrtyna shyǵaryp, kýágersiz jerde uryp-soqqan. Zardap shekken azamat alǵashynda esin jıǵanymen, keıin úıinde esinen tanyp, jedel járdemmen reanımasııaǵa jetkizilgen.
Medısınalyq qorytyndyǵa saı, jábirlenýshi jabyq bas súıek-mı jaraqatyn, mıdyń kógerýin, qabyrǵalardyń synýyn, ókpeniń zaqymdanýyn jáne kóptegen dene kógerýlerin alǵan.
Kúzetshi sotta kinásin moıyndaýdan bas tartty. Alaıda ol da, qorǵaýshy tarap ta úkimge apellıasııalyq shaǵym túsirmegen.
Janel TО́LEÝBEKOVA, EUÝ stýdenti
