«Shegirtkeniń egindikke, mal jaıylymyna, tabıǵı ósimdikterge jappaı taralýy – tabıǵı apat. Saıaq shegirtkege qarsy hımııalyq óńdeý jumysyna jergilikti bıýdjet esebinen 349,9 mln teńge qarastyrylǵan. 2023 jyly saıaq shegirtkege qarsy óńdeý jumysyna jergilikti bıýdjet esebinen 120 mln teńge, ótken jyly 201,7 mln teńge qarajat bólingen bolatyn. Almaty oblysy ákimdigi tarapynan bul másele turaqty baqylaýǵa alynǵan», deıdi oblys ákiminiń orynbasary Áset Masabaev.
О́ńirde úıirli jáne saıaq shegirtkelerge qarsy hımııalyq óńdeý jumystary 113 997 ga jerge júrgiziledi. Sonyń ishinde respýblıkalyq bıýdjet esebinen erekshe qaýipti úıirli shegirtkelerge qarsy júrgizilgen óńdeý jumysynyń kólemi – 63 438 ga, onyń ishinde: ıtalııalyq shegirtke – 46 755 ga, azııalyq shegirtkege – 16 683 ga.
«Úıirli shegirtkelerge qarsy hımııalyq óńdeý júrgizetin merdiger kompanııalar aıqyndaldy. 10 jerústi búrikkish tehnıkalary, 1 jeńil ushaq, 2 asa jeńil ushaq qatystyrylyp, hımııalyq óńdeý jumystaryn «ZaRaGrand», «AVIASILA» jaýapkershiligi shekteýli seriktestikteri atqaratyn bolady. Merdiger kompanııalar qosymsha sý tasyǵysh avtokólikter, ranstyq búrikkishter, nasos qondyrǵylary men dári tasymaldaýshy tehnıkalarmen qamtamasyz etilgen. Sonymen qatar úıirli shegirtkelerge qarsy hımııalyq óńdeýge 2 dron apparaty, «Fıtosanıtarııa» RMM-nyń 4 búrikkishi, basqa da tehnıkalary tartylady. Naýqan kezinde barlyǵy
201 adam, 46 avtokólik qatystyrylady», dedi oblystyq aýmaqtyq ınspeksııa basshysy Darhan Ábilǵazıev.
Kórshiles Jambyl, Qaraǵandy, Jetisý oblystyq aýmaqtyq ınspeksııalarmen shegirtke tektes zııankesterge, basqa da asa qaýipti zııandy organızmderge qarsy fıtosanıtarlyq is-sharalardy birlesip atqarý jóninde yntymaqtastyq kelisimshart jasalǵan.
Hımııalyq qosyndylar topyraqpen qosa, adam densaýlyǵyna aıtarlyqtaı zalal keltiredi. Búginde elimizde 92 preparat túri tirkelse, onyń altaýy ǵana bıologııalyq sanatta. Sondyqtan ǵalymdar bul máseleniń tezdetip sheshim tapqany jón dep otyr.
«Biz birqatar bıologııalyq preparat jasap shyǵardyq. Atap aıtsaq, elimizde qoldanýǵa ruqsat etilgen preparattardyń qatarynda ınstıtýt ǵalymdary jasaǵan otandyq 2 preparat bar. Ekologııalyq taza, tabıǵattaǵy paıdaly jándikterge, adamdarǵa keri áseri joq bıologııalyq kúres tásilderin jasaýmen tyndyrymdy aınalysyp jatyrmyz», deıdi J.Jıenbaev atyndaǵy Qazaq ósimdik qorǵaý jáne karantın ǵylymı zertteý ınstıtýtynyń basqarma tóraǵasy Baqytjan Dúısenbekov.
Almaty oblysy
