KazChess komandasy fınalǵa deıin jetip, Qazaqstan shahmattan álemde derjavaǵa aınalyp kele jatqanyn pash ete tústi.
«Blısten komandalyq álem chempıonatynda tamasha oıyn kórsetip, kúmis medal jeńip alǵan Kazchess komandasyn quttyqtaımyz! Biz shynymen de myqty jáne yntymaǵy jarasqan ujym qura aldyq. Jas shahmatshylarymyz ben tájirıbeli oıynshylarymyz búkil týrnırdi abyroımen ótkizip, tegeýrindi qarsylastaryn yǵystyrdy. Bul týrnır bizdiń álemniń eń myqty komandalarymen teń dárejede básekeles bola alatynymyzdy aıqyndady. Oıynshylarymyzdyń jas ereksheligi men áleýetin eskere otyryp, aldaǵy ýaqytta talaı ret úlken jeńiske jetemiz dep senemiz», – dedi Qazaqstan shahmat federasııasynyń prezıdenti Tımýr Týrlov.
KazChess komandasy atynan qatysqandar: Aleksandr Grıshýk (2683, FID), Rıhard Rapport (2631, Vengrııa), Andreı Esıpenko (2646, FID), Dármen Sádýaqasov (2575), Aldııar Ańsat (2488), Merýert Kamalıdenova (2255), Elnaz Qalıahmet (2189), Islam Aıten (1929, áýesqoı shahmatshy). Kapıtandyq mindetti Qazaqstan shahmat federasııasynyń atqarýshy dırektory, bilikti maman Gúlmıra Dáýletova arqalady.
KazChess komandasy D tobyndaǵy oıynda ekinshi orynǵa shyqty, sodan keıin 1/8 fınalda Rookies komandasyn jeńdi, shırek fınalda Freedom ujymyn basyp ozdy jáne jartylaı fınalda Uzbekistan komandasynan basym tústi. Fınalda KazChess oıynshylary WR Chess Team ujymyna ǵana ese jiberdi. Álem chempıonatynyń jeńimpaz klýbyna – 75 000, kúmis medal oljalaǵan ujymǵa – 50 000, qola júldegerlerge – 30 000, 4-oryn alǵandarǵa – 20 000, 5- orynǵa turaqtaǵan komandaǵa 15 000 eýro tabys etildi.
Qazaqstannyń alty shahmatshysy jekeleı saıysta da dara shyqty. Týrnırlik perfomans boıynsha anyqtalatyn toǵyz taqtanyń árqaısysynda úzdik oıynshylar úshtigine endi. Erǵalı Súleımen (Rookies, 7-shi taqta) men Aldııar Saılaýbaı (Ashdod Elit Chess Club, 9-shy taqta) altyn medal jeńip aldy. Aldııar Ańsat (KazChess, 6-shy taqta), Ksenııa Balabaeva (Barys.kz, 7-shi taqta) jáne Dármen Dáýren (Rookies, 9-shy taqta) kúmis júldeni qanjyǵasyna baılady. Danııal Sápenov (Rookies, 2-shi taqta) qola medalge ıe boldy.
Rapıd pen blısten 2025 jylǵy komandalyq álem chempıonaty úshinshi márte ótti. Alǵash 2023 jyly Dıýsseldorf qalasynda ótti, ekinshisi byltyr Astanada uıymdastyryldy. Al bıyl 11-15 maýsym aralyǵynda Londonda 52 komanda jınaldy. Bir kún buryn rapıdten jarys aıaqtaldy: Team MGD1 altyn, Hexamind Chess Team kúmis, Freedom komandasy qola medal aldy. Blıste (3 mınýt + ár júris úshin 2 sekýnd) komandalar alty taqtada: tórt negizgi, bir áıelder taqtasynda, reıtıngi 2000-nan tómen áýesqoı oıynshyǵa arnalǵan bir taqtada baq synasty.
