Kórmeniń ashylý saltanatynda Ulttyq mýzeıdiń dırektory Berik Ábdiǵalıuly ǵalymnyń murasy – qazaq eliniń rýhanı tuǵyryn bıiktetetin máńgilik qazyna ekenin atap ótti.
«Shoqan – áli de tolyq zerttelmegen, bolashaq urpaqqa tanylýǵa tıis mol muranyń ıesi. Onyń ómir joly men eńbekteri – qazaq ǵylymynyń bastaýy», dedi Berik Ábdiǵalıuly.
Sondaı-aq jıynda Mádenıet jáne aqparat mınıstri Aıda Balaevanyń arnaıy quttyqtaý haty oqyldy. Hatta Shoqan Ýálıhanovtyń qazaq ǵylymy men aǵartý salasyna qosqan úlesi, onyń murasyn zamanaýı zerdeleý men nasıhattaýdyń ózektiligi atap ótildi.
Kórme aıasynda uıymdastyrylǵan dóńgelek ústelde zııaly qaýym ókilderi men ǵalymdar Shoqan murasyna qatysty tushymdy oı-pikirin aıtty.
«Shoqan bes jasynan ákesiniń janynda júrip, bilimge erekshe qushtarlyq tanytqan. Oqymaǵan páni joq deýge bolady. Etnografııa, shyǵystaný, túrki halyqtarynyń tarıhy men mádenıeti, geografııa, zań, ádebıet sııaqty salalardy erkin meńgergen. Orys jáne Eýropa ǵylymyn Shyǵys órkenıetimen ushtastyra bilgen. Qashqarııaǵa jasaǵan sapary ǵylymı turǵydan da, saıası mańyzymen de erekshelendi. Bul sapar – Reseı men Qytaı arasyndaǵy qatynasqa yqpal etken tarıhı oqıǵa», dedi fılologııa ǵylymdarynyń doktory Serik Negımov.
Kórmeniń ekspozısııalyq qurylymy birneshe bólimnen turady. Uly tulǵanyń balalyq shaǵy, Omby kadet korpýsyndaǵy oqý kezeńi, alǵashqy zertteýleri, Qashǵar joryǵy men ǵylymı saıahattary, tarıhı, quqyqtyq jáne etnografııalyq muralary, sondaı-aq Shoqan beınesiniń óner men ádebıettegi kórinisterine arnalǵan. Ekspozısııada ǵalymnyń qoljazbalary, jeke kúndelikteri, hattary, ǵylymı eńbekteri, sondaı-aq ózine tıesili zattar – qarý-jaraǵy, beldigi, sandyǵy, otbasylyq jádigerler kórsetilgen. Sonymen birge Qashqar saparyna qatysty kartalar men fotoderekter, sırek arhıv qujattary usynylǵan.
Aıta keteıik, kórme Sh.Ýálıhanov atyndaǵy Altynemel memorıaldyq mýzeıi jáne Syrymbet tarıhı-etnografııalyq mýzeıiniń birlesýimen uıymdastyrylyp otyr. Atalǵan kórme 12 shildege deıin jalǵasady.
Jibek BOLYSBEK,
L.N.Gýmılev atyndaǵy EUÝ-dyń 3-kýrs stýdenti
