2015 jyly qurylyp, 2018 jyly iske qosylǵan sátten bastap AHQO turaqty ósim kórsetip keledi. 1000 tirkelgen kompanııa mejesine úsh jyldan asa qyzmetten keıin - 2021 jyldyń qyrkúıeginde qol jetkizilse, kelesi eki jylda, ıaǵnı, 2023 jyldyń shildesinde 2000 kompanııa, al bir jyldan keıin, 2024 jyldyń tamyzynda AHQO ıýrısdıksııasynda 3000 kompanııa tirkeldi. Al endi bir jyldan az ýaqyt ótken soń – 2025 jyldyń maýsymynda 4000 qatysýshy belesi eńserildi.
Jańadan tirkelgen kompanııalardyń kóbi qarjy qyzmetteri, paıdaly qazbalardy barlaý jáne óndirý, ónerkásiptik óndiris jáne saýda-sattyq salalarynda jumys isteıdi, bul AHQO-nyń ekonomıkanyń ártúrli salalaryndaǵy bıznes úshin tartymdylyǵyn rastaıdy.
Jańa qatysýshylar qatarynda – Ulybrıtanııanyń jetekshi zertteý joǵary oqý oryndarynyń bedeldi Russell Group quramyna kiretin álemge áıgili Kardıff ýnıversıtetiniń enshiles qurylymy Cardiff University Kazakhstan Holdings Limited bar. 1884 jyly qurylǵan Kardıff ýnıversıteti Ulybrıtanııada túlekterdiń jumysqa ornalasý deńgeıi boıynsha 12-shi orynda. Qazaqstanda ókildiktiń ashylýy Memleket basshysynyń sheteldik ýnıversıtetterdi tartý jónindegi strategııalyq bastamasyna sáıkes keledi. Bul joba 2024 jyldyń 14 tamyzynda Astanada álemdik deńgeıdegi ǵylymı-zertteý ýnıversıtetin qurý boıynsha Kardıff ýnıversıtetimen ózara túsinistik týraly memorandýmǵa qol qoıǵan QR Ǵylym jáne joǵary bilim mınıstrliginiń qoldaýymen júzege asyrylýda.
AHQO Basqarýshysy Renat Bekturov: «Biz kóptegen kompanııalardyń «Astana» halyqaralyq qarjy ortalyǵyn jumys isteý jáne Qazaqstanda bıznes júrgizý alańy retinde tańdap jatqanyna qýanyshtymyz. 4000 qatysýshy kompanııa mejesin eńserý geografııanyń odan da ulǵaıýyn bildiredi, bul asa qýantarlyq jaıt – AHQO qarjy haby retinde óz mıssııasyn dáıekti túrde oryndap keledi. Kompanııalar sanynyń kóbeıýi — bul jergilikti mamandar úshin jańa jumys oryndarynyń ashylýy, salyq túsimderiniń artýy jáne qosymsha kásibı tájirıbe aǵyny».
AHQO-da jaqynda tirkelgen basqa da kompanııalardyń qatarynda:
- Caspian Port Development Company Limited – Noatum Ports (AD Ports Group quramyna kiredi) jáne Semurg Holding B.V. (BVI) birlesken kásiporny. Kompanııa Quryq portyndaǵy termınaldyq ınfraqurylymdy damytýmen aınalysady. Joba Qazaqstan Respýblıkasynyń 2030 jylǵa deıin Kólik-logıstıka áleýetin damytý konsepsııasy negizinde júzege asyrylyp otyr.
- Vishwa Samudra Hospitality Services (Kazakhstan) Ltd. – Sıngapýr, BAÁ, AQSh jáne Germanııadaǵy ınfraqurylym, logıstıka, teńiz tasymaly, jyljymaıtyn múlik jáne t.b. salalarda jumys isteıtin Vishwa Samudra úndi tobynyń enshiles qurylymy. Qazaqstanda kompanııa qurylys jobalaryn júzege asyrýǵa basa nazar aýdarady.
- Coteccons Construction KZ Ltd. – Ońtústik-Shyǵys Azııadaǵy eń iri jeke qurylys salýshylardyń biri, vetnamdyq alpaýyt Coteccons Construction JSC-tiń 100% enshiles kompanııasy. 800-den astam jobany sátti aıaqtaǵan jáne 2500 kásibı mamannan turatyn komandasy bar kompanııa ınjınırıngtiń joǵary standarttaryn engize otyryp, Qazaqstannyń ınfraqurylymyn damytýǵa úles qosýdy josparlap otyr.
- Qazaqstannyń mádenı jáne kreatıvti ındýstrııalar qory – mádenı jáne kreatıvti jobalardy qoldaý, damytý jáne ınvestısııa salý úshin qurylǵan qaıyrymdylyq uıym. Qor qazaqstandyq mádenı murany jáne zamanaýı kreatıvti ındýstrııany ilgeriletýdi maqsat etip otyr.
- Dodo Brands – Dodo Pizza jáne Drinkit jelilerin basqaratyn Eýropadaǵy eń iri fýd-servısterdiń biri (top-7-ge kiredi). Jaqynda kompanııa Vırgın araldarynan AHQO-ǵa redomısılıasııa jasady. Álemniń 26 elinde 1300-den astam bólimshesi ashyldy, onyń ishinde 100-den astam pısserııa men 14 kofehana Qazaqstanda jumys isteıdi. Bul sheshim tez damyp kele jatqan jáne tehnologııalyq bıznes úshin AHQO-nyń tartymdylyǵyn kórsetedi.
Búginde AHQO-da álemniń 84 elinen kelgen kompanııalar tirkelgen. Kompanııalar sany boıynsha alǵashqy ondyqqa Qytaı, Reseı, Ulybrıtanııa, AQSh, Túrkııa, Sıngapýr, BAÁ, Úndistan, Kıpr jáne Nıderlandy kiredi. AHQO qatysýshylary retteletin qarjy ınstıtýttary, fınteh-startaptar, naryqtyq ınfraqurylym provaıderleri, qosalqy qyzmetter jáne basqa da baǵyttar retinde ártúrli uıymdyq-quqyqtyq nysandarynda jumys isteıdi.
