2021–2022 jyldary Aıalaǵa ońaı bolǵan joq. Aıaǵyndaǵy jaraqaty onyń kásibı mansabyna toqtaý salyp, tatamıden ýaqytsha alystaýyna týra keldi. Bala kúninen dzıýdomen tynystap ósken úlken júrektiń ıesi armanynan bas tartpady. Eki jyl boıy ishteı kúresip, dzıýdoǵa degen qushtarlyǵy men otbasynyń qoldaýynyń arqasynda tatamıge qaıta oraldy.
Taǵdyr Aıalany birde mańdaıynan sıpasa, endi birde synap ta kórdi. Aıaǵynan alǵan aýyr jaraqat onyń sporttaǵy jolyn bógep, úlken úziliske májbúr etti.
«Jaraqatyma deıin dzıýdodan ótken halyqaralyq jarystarda synǵa túsip shyńdaldym. Átteń, naǵyz juldyzdy shaǵym bastaldy-aý degende, taǵdyr aıaǵymnan shalyp, súıikti isimnen aıyrdy. Sol kezeńde dostarymnyń qatary azaıyp, ortam sıredi. Tipti keıbir jattyqtyrýshylarym meni dzıýdonyń mańyna jolatqysy kelmedi. Kóńilime kelgeni de osy – saý kezde bári kóteredi, basyńa is tússe eshkimge keregiń bolmaı qalady eken. Qarjylaı kómek kórmegen soń, ýaqytynda em-domymdy alýǵa qolym qysqa boldy. Qıyn sátte qasymnan tabylǵan tek ata-anam ǵana, ol kisilerge aıtar alǵysym sheksiz», deıdi Aıala, keshegi kúnderdi kózi jasqa tola otyryp eske alyp.
Aıala bir jarym jyldan asa ýaqyt jarystardan shet qalyp qoıǵanyna qaramastan, sporttan óz ornyn qaıta tabýǵa bekinedi. Parıj Olımpıadasyna birneshe aı qalǵanda paradzıýdo týraly estip, jan-jaqty zerttep, qurbysy Aqmaral Naýatbekten keńes surap, tatamıge oralady. Osylaısha, Aıala alǵashqy qadamynan-aq tórt jylda bir ótetin álemdik dodaǵa joldama jeńip aldy.
«Eki jyldyq úzilisten keıin Parıj oıyndaryna baryp, bozkilemde kúresý men úshin kútpegen jetistik boldy. Fransýz halqy sportty «klassıkalyq» nemese «para» dep bólmeıdi eken. Barlyq adamnyń múmkindigin teń sanaıdy. Ony Paralımpıada oıyndarynda anyq baıqadym. Tatamıdegi eki sportshyǵa myńdaǵan adam qoldaý bildirdi. Buǵan deıin osynshama jankúıerge boıym da, kózim de, qulaǵym da úırenbegendikten, qatty tolqydym. Álemdik deńgeıde óner kórsetý bylaı tursyn, júzdegen memleketten jınalǵan halyqtyń aldynda kúsh synasýdyń ózine psıhologııalyq turǵyda daıyndyq kerek eken. Qazaq jankúıerlerine nalıtynym – parasportqa kóp jankúıerlik tanyta bermeıdi. Mamyrda Astanada ótken álem chempıonatynda bul olqylyq qatty baıqaldy», deıdi qaısar qyz ishki ókinishin jasyra almaı.
Byltyr Parıjden elge oralǵan soń, Aıala densaýlyǵyna kóńil bólip, aıaǵyna operasııa jasatty. Jarty jyldaı tynyǵyp, jattyǵýǵa qaıta kiristi. Jýyrda Astana tórinde ótken paradzıýdodan álem chempıonatyna qatysyp, kúmis júlde ıelendi. Fınalda Paralımpıadanyń eki dúrkin chempıony, brazılııalyq Alana Maldonadoǵa ese jiberdi.
Komandalyq tartysta ulttyq quramamen birge álem chempıony atandy. Jahandyq doda kezinde jaraqatynan qulan taza aıyqpaǵan edi. Qurbysynyń jaǵdaıyn jaqsy biletin Parıj Paralımpıadasynyń chempıony Aqmaral Naýatbek oǵan yrymdap óz shulyǵyn kıgizip jiberipti. Sport áleminde el namysyn qorǵap júrgen qos arýdyń bul jarastyǵy – naǵyz dostyqtyń úlgisi.
Aıalanyń ár beldesýi – tózim men tabandylyqtyń kórinisi, kóptegen jas sportshyǵa úlgi. Qaısar qyz aldaǵy ýaqytta Los-Andjeleste ótetin Olımpııa oıyndarynda Kók týymyzdy kókke jelbiretip, Ánuranymyzdy shyrqatqysy keledi.
Arýjan ABAIQYZY,
L.N.Gýmılev atyndaǵy EUÝ-dyń 3-kýrs stýdenti
