Sýret: gov.kz
Mádenıet jáne aqparat mınıstrligi Jastar jáne otbasy isteri komıtetiniń qoldaýymen, «Jastar» ǵylymı-zertteý ortalyǵynyń bastamasymen qolǵa alynǵan bul jobaǵa eki jyl boldy. «JastarX» alańynda azamattar belgili bir taqyryp tóńireginde óz oıyn erkin aıtyp, eldiń damýyna negiz bolatyn ońtaıly sheshimderdi usynady.
Maýsymnyń alǵashqy júzdesýi «Jańa býynnyń qundylyqtary: ýaqyt kórinisi» taqyrybyna arnaldy. Basqosýda jastar ǵalymdarmen birge qazirgi qoǵamdaǵy olardyń róli, jańa áleýmettik strategııalardy qalyptastyrýǵa qosar úlesi sekildi mańyzdy máselelerdi talqylady.
Buǵan qosa jıynda «Til-Qazyna» ulttyq ǵylymı-praktıkalyq ortalyǵynyń ókili Áıgerim Serikjanova qazaq tilin sıfrlandyrý jobasyn tanystyryp, jasandy ıntellekt negizindegi TilQazyna LLM tildik modelin kórsetti. Bul ınnovasııalyq ónim qazaq tiliniń leksıka, morfologııa men semantıkanyń taǵy basqa salasynda, onyń ishinde qazaq tilinde mátindi generasııalaý, perıfraz jasaý, kontekspen jumys isteý, yqshamdaý, sondaı-aq grammatıkalyq jáne pýnktýasııalyq qatelerdi túzetý, frazeologızmderdiń mánin ashý, termınderdi aýdarý syndy tapsyrmalardy oryndaıdy.
Al «United Central Asian Professionals» jobasynyń úılestirýshisi jáne Nazarbaev ýnıversıtetiniń ǵylymı kómekshisi Arýjan Kaparova jastardyń klımattyq daǵdarysty eńserýdegi róline nazar aýdardy. Onyń aıtýynsha, jas urpaq kún tártibindegi ekologııalyq máselelerge belsendi aralasyp, klımattyń ózgerýi saldarlarynyń kúsheıýin eskere otyryp, ornyqty bolashaqty qalyptastyrýǵa úles qosýǵa tıis.
О́z kezeginde «Jastar» ǴZO áleýmettanýlyq zertteýler jáne boljaý basqarmasynyń jetekshisi Sabına Shaımerdenova jastardyń negizgi qundylyqtary jónindegi keıingi zertteý nátıjelerimen bólisti. Anyqtalǵandaı, qazirgi jas býyn úshin basty qundylyqtar qatarynda otbasy, densaýlyq jáne turaqtylyq mańyzdy. Sondaı-aq saýalnama barysynda mamandar jastardyń sıfrlyq tehnologııalarǵa joǵary qyzyǵýshylyǵyn jáne áleýmettik jelilerdegi erekshe belsendiligin baıqaǵan.
Kámshat TО́LEGENOVA,
L.N.Gýmılev atyndaǵy EUÝ-dyń 2-kýrs stýdenti
