Vetnam eline jol tartqan bıdaıdyń jalpy salmaǵy 1,7 myń tonnany quraıtyn 62 konteınerden quralǵan. Konteınerler teńiz kemelerine tıelgennen keıin, bıdaı Vetnamnyń Haıfon portyna jetkiziledi. Qazaq astyǵynyń Vetnamǵa sátti jóneltilgeni týraly Qytaıdyń ortalyq telearnasy men Qytaı halyqaralyq telejelisinde kórsetildi.
Lıanıýngan portyndaǵy logıstıkalyq baza «bir konteıner – bir servıs» qaǵıdasymen jumys isteıdi. Bul model boıynsha júktiń bastapqy núkteden sońǵy mejege deıin qaıta tıeýsiz bir konteınerde jetkizilýi qamtamasyz etiledi. Osy tehnologııanyń arqasynda temirjoldan teńiz portyna ótý ýaqyty nebári bir saǵatqa sozyldy. Sonymen qatar, qazaqstandyq bıdaı barlyq rásimder jedel túrde júrgiziletin «jasyl dáliz» arqyly júredi.
«Bastapqy núkteden sońǵy mejege deıin bir konteınerde jetkizý» formaty Ońtústik-Shyǵys Azııaǵa baǵyttalǵan qazaqstandyq eksportqa sapaly ári tıimdi qurlyqtyq-teńizdik ıntermodaldy qyzmet kórsetýdi qamtamasyz etti. Budan bólek, qytaı eliniń logıstıkalyq bazasy keden, port, temirjol men basqa da vedomstvolardyń qoldaýyna ıe boldy. Nátıjesinde porttaǵy júktiń rásimdelý tıimdiligi 70%-ǵa artqan.
Anyǵy, alǵashqy bıdaı partııasy Aqmola oblysyndaǵy astyq qabyldaý kásiporyndarynda daıyndalǵan. Jalpy, Vetnamǵa shamamen 15 myń tonna azyqtyq bıdaı jóneltiledi dep josparlanyp otyr. «Azyq-túlik kelisimshart korporasııasy» UK» AQ basqarma tóraǵasy Asylhan Júnishevtiń aıtýynsha, jańa logıstıkalyq baǵyttar otandyq agrarshylar úshin alys shetel naryqtaryna shyǵýǵa jol ashyp otyr.
«Qytaılyq áriptestermen birlesip qurylǵan ınfraqurylym búginde naqty nátıjesin kórsetýde – bul turaqty ári jedel jetkizilim. Bul – elimizdiń eksporttyq áleýetin damytýdaǵy mańyzdy qadam», dedi korporasııa basshysy.
Jyl basynan beri «Azyq-túlik kelisimshart korporasııasy» eksportqa 196 myń tonna astyq jóneltti. Eń iri partııalar Soltústik Afrıka, Ońtústik-Shyǵys Azııa jáne Iran naryqtaryna jiberildi.
