Infografıkany jasaǵan – Záýresh Smaǵul, «EQ»
Rezervshiler 2019 jyldan bastap iriktele bastady. Sol jyly 300 adamdy birden qabyldap, 2021 jyly – 50, 2023 jyly 50 jas Prezıdenttik jastar kadr rezerviniń qataryna qosyldy. Irikteý eki jyl saıyn ótkiziledi. Bıyl da 50 adam qabyldanady.
Jalpy, memlekettik qyzmet qol jetpeıtin salaǵa aınalmaýǵa tıis. El basqarý isine ozyq oıly, bastamashyl mamandar kelýi qajet. Prezıdenttiń kózdegeni – osy. Qazir 400 rezervshiniń 80 paıyzy qyzmetke ornalasqan. Jastar kadr rezervine qabyldanatyn 35 jasqa deıingi azamattar kez kelgen ýaqytta laýazymdy qyzmetke taǵaıyndala alady.
«Qazaqstan – balalar men jastarǵa jan-jaqty qoldaý kórsetetin álemdegi az eldiń biri. Prezıdenttik jastar kadr rezervi suranysqa ıe jobaǵa aınaldy. Keleshekte memleketti basqarýshylardyń negizgi legi osy jas mamandardan qalyptasady. Saıası reformalar aıasynda Májilis pen máslıhattarda jastar úshin arnaıy kvota engizildi. Bul ókildik bılik qyzmetine tyń serpin berdi. Osy jerge jınalǵan bilimpaz, otanshyl jastar máslıhattyń nemese Parlamenttiń quramyna kiretinine, tipti Úkimette jumys isteıtinine kámil senemin», degen edi Prezıdent Qasym-Jomart Toqaev «Jańa adamdar» jastar forýmynda sóılegen sózinde.
Prezıdenttik jastar kadr rezerviniń bıylǵy kandıdattary alty salalyq baǵyt boıynsha baq synaıdy. Memlekettik qyzmet isteri agenttiginiń málimetine sáıkes, irikteý memlekettik apparattyń salalyq kadrlarǵa qajettiligin eskere otyryp, ınfraqurylym, ónerkásip jáne saýda saıasaty, agroónerkásiptik keshen jáne qorshaǵan orta, syrtqy saıasat jáne ınvestısııalar, ekonomıkalyq jáne qarjylyq saıasat, sıfrlandyrý, áleýmettik saıasat jáne azamattyq qoǵam syndy negizgi salalar boıynsha júrgiziledi. Kandıdat tirkelý kezinde kórsetilgen salalyq baǵyttardyń birin tańdaýy qajet.
Osy jyldaǵy tórtinshi irikteýdiń ereksheligi de osy – ár baǵyt boıynsha kandıdattardyń birkelki sanyn qamtamasyz etý maqsatynda árbir kezeńde proporsıonaldy irikteý ótkizilmek. Iаǵnı rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziledi.
Al kandıdattarǵa qoıylatyn jalpy talaptarda ózgeris joq. Buǵan deıin ótkizilgen irikteýdiń talaptary sekildi kandıdattardyń jasy 35-ten aspaýy qajet, sondaı-aq joǵary bilimdi, bes jyldan kem emes eńbek ótili jáne qazaq tilin meńgerýi V1 deńgeıinen tómen bolmaýy kerek.
Irikteýge Prezıdent taǵaıyndaǵan adamdar, saıası qyzmetshiler, «A» korpýsynyń memlekettik ákimshilik qyzmetshileri jiberilmeıdi.
Negizi Prezıdenttik jastar kadr rezervin qalyptastyrý tásilderi otandyq jáne sheteldik ozyq tájirıbeni eskere otyryp ázirlengen. Irikteýdiń birqatar quraldary men tehnologııalary Sıngapýr, AQSh, Ulybrıtanııa, Kanada sekildi damyǵan elderde qoldanylady. Sondaı-aq irikteýdiń otandyq tájirıbesi birqatar elde tanystyrylyp, sheteldik sarapshylardyń joǵary baǵasyna ıe bolǵan.
