Ádilet vıse-mınıstri Bekbolat Moldabekov E-Zańnama jobasy zań shyǵarýdyń barlyq úrdisin biryńǵaı júıege biriktirý maqsatynda qurylǵanyn, bul normalar ádilet salasyn sıfrlandyrýdaǵy kóshbasshy jobalardyń biri ekenine toqtalyp: «Zań shyǵarýdyń barlyq úrdisin biryńǵaı júıege biriktirý arqyly zań jobasynyń ómirlik sıkline tolyq jaýap beretin fýnksıonal iske asyrylady. Iаǵnı zańnyń ázirlenýinen bastap, Memleket basshysynyń qol qoıýyna deıingi barlyq úrdisti baqylaýǵa, osy salanyń ashyqtyǵyn qamtamasyz etýge múmkindik týady», dedi spıker óz sózinde.
Sondaı-aq Bekbolat Serikuly Ádilet mınıstrligi jasandy ıntellekt negizindegi sıfrlyq zań keńesshisin iske qosqanyn súıinshiledi. Endi el azamattary mınıstrliktiń saıty arqyly quqyqtyq keńesshiniń onlaın kómegin tutyna alady. Táýligine 24/7 rejimde jumys isteıtin qurylym quqyqtyq máselelerge qatysty keń aýqymdy keńes berýge qabiletti. Mınıstrlik kelesi kezeńde osy júıege smart-assıstentti engizýdi josparlap otyrǵanyn, smart-assıstent normatıvtik quqyqtyq aktilerdi ázirleýshilerge saraptamalyq qoldaý kórsetetinin málim etti.
Mınıstrlik ókili atqarýshylyq is júrgizý rásimderin avtomattandyrý aıasynda engizilgen «sıfrlyq sot oryndaýshysy» sybaılas jemqorlyq faktilerin azaıtýǵa múmkindik beretinine de toqtaldy.
«Sıfrlyq sot oryndaýshysy» avtomatty rejimde adamnyń qatysýynsyz atqarýshylyq is júrgizýge múmkindigi bar. Bul sheshim adamı faktordy joıýǵa, sybaılas jemqorlyqtyń jolyn kesýge, qaryzdy óndirip alý úrdisin edáýir jedeldetýge múmkindik beredi. Máselen, buryn boryshkerler jeke sot oryndaýshysyna borysh somasynyń ústinen 25 paıyzyna deıin komıssııa túrinde qosymsha aqy tóleýge májbúr bolýshy edi. Sot oryndaýshylardyń jumysyn avtomattandyrý arqyly bul shyǵystar alynyp tastaldy. Nátıjesinde, qarapaıym halyqtyń qaltasyndaǵy 1,2 mlrd teńgeden asa qarajat únemdeldi», dedi spıker.
Ádilet vıse-mınıstri Bekbolat Moldabekov biz sóz etken «Quqyqtyq keńesshi» men «Smart-assıstent» sıfrlyq modýlderi tolyqtaı iske qosylǵannan keıin el azamattary jeke sot oryndaýshylarynyń áreketterin baqylap, atqarýshylyq ister týraly der kezinde aqparat ala alatynyn, sot oryndaýshylarynyń áreketine nemese áreketsizdigine qatysty shaǵymdanýǵa da múmkindik týatynyn, bul qural atqarýshylyq is júrgizý júıesine degen ashyqtyq pen senimdi arttyratynyn tilge tıek etti.
Sonymen qatar Bekbolat Serikuly buryn tek qaǵaz túrinde júrgizilip kelgen notarıýstyń atqarýshylyq jazba berý rásimi de sıfrlandyrylatynyn málimdedi.
«Qazir notarıýstyń atqarýshylyq jazba berýdiń jeke kabıneti quryldy. Sol arqyly boryshkerdiń habarlama jáne qarsylyq joldamasyn alý múmkindigi bar. Eger azamattar tarapynan qarsylyqtar bolsa, notarıýstyń atqarýshylyq jazbasynyń kúshin joıýǵa múmkindik bar», dedi vıse-mınıstr.
Bekbolat Moldabekov jobany iske asyrý nátıjesinde 9 500 atqarýshy jazbanyń joıylǵanyn, bul azamattardyń quqyqtaryn qalpyna keltirýdegi jáne teris paıdalanýdy joıýdaǵy mańyzdy qadam bolǵanyn aıtty.
Sonymen qatar sala ókili Ádilet mınıstrliginiń quqyqtyq qyzmetter men sot-saraptama úrdisterin sıfrlandyrý baǵytynda mańyzdy qadamdar jasap jatqanyn, memlekettik zań kómegin kórsetýdi qamtamasyz etetin biryńǵaı sıfrlyq E-Zań men E-Saraptama júıesi qurylǵanyn, osy júıe arqyly azamattar óz quqyqtaryn tıimdi, ýaqtyly jáne ádil qorǵaı alatynyn, nátıjesinde qaǵazbastylyq azaıǵanyn málimdedi. Búginde eldegi qylmystyq sot isin júrgizýdiń 90 paıyzdan astamy elektrondy túrde júzege asyrylady eken. Sondaı-aq korporatıvtik qujat aınalymyn jetildirý maqsatynda zańdy tulǵalardyń bergen senimhattaryn sıfrlandyrý da qolǵa alynǵan.
