Strategııalyq seriktestiktiń berik negizi

Syrtqy ister mınıstrligi derek­teri boıynsha, qazir Qazaqstanda qytaı­lyq ınvestorlardyń qatysýy­men 50 myńǵa jýyq jumys orny ashylyp, jalpy quny 66,4 mlrd dollar bolatyn 224 ındýstrııalyq joba júzege asyrylýda. QHR Qazaqstan ekonomıkasyndaǵy eń iri ınvestorlardyń bestigine kiredi: 2005–2024 jyldar aralyǵynda ınvestısııa kólemi  26,4 mlrd dollardy qurady.

Premer-mınıstr QHR Tóraǵa­synyń taıaýda Qazaqstanǵa jasa­ǵan sapary yntymaqtastyqqa eleýli serpin bergenin atap ótti. Son­daı-aq Astanada ótken «Ortalyq Azııa – Qytaı» ındýstrııalyq jáne ınvestısııalyq yntymaqtastyq forýmynyń mańyzdylyǵy atap ótildi. Forým aıasynda Qazaqstan men Qytaı arasynda jalpy quny 24 mlrd dollardy quraıtyn 58 kom­mersııalyq kelisimge qol qoıyldy.

«Memleket basshysy 2029 jylǵa deıin keminde 150 mlrd dollar kóleminde sheteldik ınvestısııa tartý mindetin qoıdy. Osy turǵyda jetekshi ekono­mıkalyq derjavalardyń biri jáne bizdiń negizgi ınvestısııalyq serik­tesimiz Qytaı elimen tolyq­qandy kooperasııany odan ári tereń­detý – Qazaqstannyń asa mańyzdy basym­dyǵy. Sondyqtan ınvestısııalar kólemin arttyrý, jańa birlesken jobalardy iske qosý, ásirese shıkizattyq emes ári eksportqa baǵdarlanǵan ónimderdi óndirý boıynsha júıeli sharalar qajet. Memleket basshysynyń shaqyrýy boıynsha QHR Tóraǵasynyń Qazaq­stanǵa taıaýda jasaǵan kezekti sapary  eki el arasyndaǵy ekonomıkalyq árip­testiktiń joǵary deńgeıin dálel­dep, odan ári nyǵaıta tústi. Árbir jobanyń júzege asyrylýy meniń tikeleı baqylaýymda bolady, tolyq qoldaý kórsetiledi», dep tapsyrdy O.Bektenov.

Premer-mınıstr jańa jobalary joq óńirlerde, onyń ishinde Abaı, Shyǵys Qazaqstan, Batys Qazaqstan oblystarynda jumysty jandandyrý qajettigin basa aıtty Oljas Bektenov atalǵan óńir basshylyǵyna qysqa merzimde seriktestermen ózara is-qımyl ornatýdy jáne naqty bas­tamalar usynýdy tapsyrdy.

Uzaqmerzimdi seriktestik ornatý jáne ınvestısııa tartý maqsatynda aımaqtyq delegasııalardyń Qytaı provınsııalaryna saparlaryn jandandyrý jónindegi tapsyr­many iske asyrýǵa nazar aýdaryldy. Oljas Bektenov QHR Tóraǵasynyń sapary aıasynda kelisimderge qol qoıyp, aldyn ala ýaǵdalastyqtardy qamtamasyz etken Astana qalasyndaǵy jáne Almaty, Qyzylorda, Túrkistan oblystary sııaqty birqatar óńirdegi oń dınamıkany atap ótti. Qalǵan óńirlerge osy baǵytta jumys isteý tapsyryldy.

Sondaı-aq keńes barysynda «Ortalyq Azııa – Qytaı» forýmy aıa­synda óńirlerdiń qytaılyq serik­tes­termen jasasqan jańa kelisimderin júzege asyrý máseleleri qaraldy. Máse­len, Almaty oblysynda «jasyl» ener­getıka, logıstıka, AО́K jáne óner­kásip salasyndaǵy joba­lar­dy qosa alǵanda, 6 mlrd dollardan as­tam somany quraıtyn 7 qujatqa qol qoıdy. Astana qalasy, Qyzylorda jáne Túrkistan oblystary ınfra­qu­ry­lym, agroónerkásip jáne óner­kásip salalarynda bastamalar usyndy.

Keńes qorytyndysy boıynsha memlekettik jáne jergilikti atqarýshy organdarǵa qol qoıylǵan kelisim­derdi is júzinde júzege asyrýdy, árbir kezeńde barlyq jobany súıe­meldeýdi, sondaı-aq biryńǵaı mem­lekettik ınvestısııalyq saıasat sheń­berinde is-qımyldardy úılestirýdi qamtamasyz etý tapsyryldy.