Foto: Jambyl oblysy ákimdiginiń aqparat jáne qoǵamdyq damý basqarmasy
2025 jyly oblys boıynsha 217 757 oqýshynyń 88,6 paıyzy – ıaǵnı 193 071 bala jazǵy saýyqtyrý jáne demalys baǵdarlamalarymen qamtylady. Bul kórsetkish balalardyń áleýmettik jaǵdaıy men jeke qajettilikterin eskere otyryp josparlanǵan.
Balalarǵa arnalǵan demalys oryndarynyń aýqymy keńeıgen. Oblys aýmaǵynda qala syrtyndaǵy lagerlerden bastap, mektep janyndaǵy kúndizgi alańdarǵa deıingi birneshe format jumys isteıdi. Atap aıtqanda:
- Qala syrtyndaǵy lagerlerge – 7 673 bala;
- Mektep janyndaǵy lagerlerge – 33 607 bala;
- Mektep alańdaryndaǵy baǵdarlamalarǵa – 147 271 bala;
- Kıiz úı men shatyrly lagerlerge – 3 505 bala;
- Respýblıkalyq lagerlerge – 315 bala;
- Ata-analar men kásipodaq qoldaýymen – 700 bala demalatyn bolady.
«Oblys aýmaǵyndaǵy 12 qala syrtyndaǵy lagerdiń 7-eýi bıylǵy maýsymda jumysyn bastap ketti. Onyń ishinde jyl boıy qyzmet kórsetetin «Móldir bulaq» oqý-saýyqtyrý ortalyǵy, sondaı-aq maýsymdyq «Balaýsa», «Juldyz», «Juryndysaı» memlekettik lagerleri jáne «Bolashaq», «Berikqara», «Taý samaly» jekemenshik lagerleri balalardy qabyldap, demalystaryn mazmundy ótkizýge jaǵdaı jasalyp jatyr», delingen habarlamada.
Aıta keteıik, bul lagerlerde negizinen kóp balaly, az qamtylǵan otbasylardyń balalary, sondaı-aq jetim jáne ata-anasynyń qamqorlyǵynsyz qalǵan balalar qamtylǵan. Jazǵy maýsymda qala syrtyndaǵy lagerlerde 7 673 bala tynyǵyp jatyr.
«2025 jyldyń 2 maýsymynan bastap 407 mektep janyndaǵy lager óz jumysyn bastady. Munda 33 607 oqýshy qamtylǵan. Bul lagerler áleýmettik kómekti qajet etetin otbasylardan shyqqan balalarǵa qoljetimdi ári úıge jaqyn ornalasqanymen tıimdi.Bilim salasyndaǵy jetistikter nazardan tys qalǵan joq. Oqý úzdikteri men túrli jarystardyń jeńimpazdary qatarynan 793 bala «Qazaqstan halqy» qorynyń demeýshiligimen qala syrtyndaǵy lagerlerde demalady. Sonymen qatar:
- 295 bala – respýblıkalyq jáne oblystyq baıqaýlar jeńimpazdary retinde «Baldáýren» respýblıkalyq oqý-saýyqtyrý ortalyǵyna joldandy
- 20 bala – kóp balaly jáne az qamtylǵan otbasylardan shyqqan oqýshylar Almaty qalasyndaǵy «Bóbek» saýyqtyrý ortalyǵynda demalýǵa múmkindik aldy», delingen habarlamada.
Sonymen qatar jergilikti jerlerdegi tarıhı jáne mádenı oryndarǵa 21 myńnan astam oqýshynyń ekskýrsııasy uıymdastyrylyp, balalardyń tanym kókjıegi keńeıip, týǵan jerge degen súıispenshiligi arta túsken.
Jaz mezgilinde balalardyń qaýipsizdigin saqtaý – asa mańyzdy másele. Osy maqsatta «2025 jylǵy sýǵa shomylý kezeńinde qaýipsizdik sharalary týraly» vedomstvoaralyq jospar bekitilip, barlyq lagerlerde aldyn alý jumystary júıeli júrgizilip jatyr. Atap aıtqanda:
- Tótenshe jaǵdaılar departamentiniń nusqaýshylary arnaıy kýrstardan ótip, sý aıdyndarynda qaýipsizdikti qamtamasyz etý;
- Sanıtarııalyq-epıdemıologııalyq baqylaý departamenti lager basshylary men medısına qyzmetkerlerine arnalǵan semınar-keńester uıymdastyrdy;
- Mektepterde ata-analar jınalystary ótkizilip, chattar arqyly qaýipsizdikke qatysty jadynamalar taratyldy.
«Jambyl oblysynda balalardyń jazǵy demalysyn uıymdastyrý – tek ýaqytty tıimdi ótkizý emes, sonymen qatar olardyń ómirlik tájirıbe jınap, densaýlyqtaryn nyǵaıtýyna, jańa bilim alýyna jáne qaýipsiz ortada tynyǵýyna baǵyttalǵan mańyzdy sharalar kesheni. Bul baǵyttaǵy jumystar oblys basshylyǵy men sala mamandarynyń udaıy nazarynda. Jaz – tek tynyǵý kezeńi ǵana emes, jańa múmkindikterge jol ashatyn ýaqyt. Sol sebepti de, balalarǵa laıyqty demalys syılaý – barsha qoǵamnyń ortaq mindeti», delingen habarlamada.
