Abaıtaný ǵylymynda Zeınelǵabıden Ámireulynyń esimin aıryqsha aıtýǵa ábden bolady. Fılologııa ǵylymdarynyń doktory, professor Mekemtas Myrzahmetuly oǵan «ulttyq oı-sanasy erte oıanǵan, sol jolda qolynan keler áreketten aıanbaǵan, Abaı murasyn baspasózde nasıhattap, tatar halqyna tanytýǵa arnaǵan talpynýshylardyń biri» dep baǵa bergen. Iаǵnı Zeınelǵabıden Ámireuly – aǵartýshy, Abaı murasyn baspa betine alǵash jarııalaǵan qaıratker. «Nasıhat Qazaqııada» qazaq halqynyń turmys-tirshiligine qatysty ózekti máseleler qarastyrylyp, aqyn Abaı Qunanbaıuly men jerlesimiz Sádýaqas Shormanovtyń óleńderi alǵash jarııalanǵan.
1909 jyly Ýfa qalasynda jaryq kórgen eńbek ensıklopedııalyq sıpatqa ıe, munda sol kezeńdegi qazaq halqy ómiriniń qoǵamdyq-saıası men áleýmettik qurylysynyń máseleleri aıqyn ashyp kórsetilgen. Sondaı-aq ol Abaı shyǵarmashylyǵynyń erekshe mańyzy bary týraly alǵashqylardyń biri bolyp málimdeıdi.
Buqar jyraý atyndaǵy Ádebıet jáne óner mýzeıiniń qyzmetkeri Abzal Rymbektiń aıtýynsha, Zeınelǵabıden ál-Jaýharıdiń atalǵan kitaby arab qarpinde, tóte nusqada jazylǵan. Tarıhı eńbektiń túpnusqasy elimizde sanaýly. Al Pavlodarda tabylǵan kitaptyń on shaqty beti ǵana saqtalǵan. Arab qarbindegi kóne paraqtar jergilikti Bıjan meshitindegi quran kitaptary arasynan shyqqan.
«Nasıhat Qazaqııada»: «Balany 11 jastan keıin ǵana orys tilinde oqytý» kerek degen másele aıtylady. Qazirgi ónertabysy men ǵylymy damyǵan japon halqy balalaryna shet tilderin úıretýdi tek 12 jastan keıin ǵana qolǵa alatyndyǵy málim. Aǵartýshy bul máseleni erterek bilip, qazaq qoǵamyna sińdirýdi maqsat etse kerek.
Atap óterligi, buǵan deıin otandyq ǵalymdar shyǵarmany kırıllısaǵa túsirip, kitap etip bastyrǵan.
Pavlodar oblysy
