Chempıondar tuǵyrdan taıdy
Byltyr Parıjde alaýy tutanǵan Olımpııa oıyndarynda altyn alǵan jeti jigittiń barlyǵy Dýnaı jaǵalaýyndaǵy jarysta boı kórsetti. Biraq olar tegisteı tatamıge shyqqan joq. Máselen, ataqty Eldos Smetov pen dańqy jer jarǵan Teddı Rıner básekelerdi syrttaı tamashalady. Qalǵandary kúresti. Bir qyzyǵy, Býdapeshtte sol kókjaldardyń birde-bireýine bas júldeni oljalaý baqyty buıyrmady. Anyqtap aıtsaq, Olımpıadanyń eki, álemniń tórt dúrkin chempıony Hıfýmı Abe (66 kg) bul joly qola medaldy qanaǵat tutty. Byltyr joǵaryda atalǵan jarystyń ekeýinde de qarsylas shydatpaǵan Zelım Kosoev (100 kg) ta dál sol mejeden kórindi. Hıdaıat Geıdarov (73 kg), Takanorı Nagase (81 kg), Lasha Bekaýrı (90 kg) múlde júldesiz qaldy. Byltyr álem chempıony atanǵan Georgıı Sardalashvılı (60 kg), Tato Grıgalashvılı (81 kg), Gokı Tadzıma (90 kg), Kım Mındjon (130 kg) da bıyl ózderiniń myqtylyǵyn moıyndata almady.
Majarstannyń bas shaharynda chempıondardyń esimderi tolyqtaı jańardy. Buǵan deıingi álem chempıonattarynda eki ret qola alǵan japonııalyq Rıýdzıý Nagaıama (60 kg) bul joly altyn tuǵyrǵa kóterildi. Onyń otandastary Takesı Takeoka (66 kg) men Sansıro Mýraoǵa (90 kg) da teń keler eshkim tabylmady. Byltyr Parıj olımpıadasyna kúmispen kúptelgen fransııalyq Joan-Benjamen Gaba (73 kg) Býdapeshtte qarsylas shaq keltirmedi. Halyqaralyq dzıýdo federasııasynyń (IJF) týy astynda óner kórsetken Reseıdiń úsh balýanynyń baq juldyzy jarqyraı jandy. Ásirese kópshilikti 73 kg salmaqtaǵy Tımır Arbýzovtyń óneri tamsandyrdy. 21 jastaǵy jigit qarsy kelgenderdi qoǵadaı japyryp, barlyq básekeni aıqyn basymdyqpen aıaqtady. Byltyr Abý-Dabıdegi álemdik dodanyń fınalynda ol áıgili Tato Grıgalashvılıden utylsa, bıyl golden-skorda oǵan san soqtyrdy. 23 jastaǵy Matveı Kanıkovskııdiń de qarqyny keremet. Jarystyń basynan aıaǵyna deıin qarsylastaryna bet qaratpaǵan ol fınalda japonııalyq Dota Araıdyń aıaǵyn aspannan keltirdi.
Áıelder arasynda Parıj olımpıadasynda top jarǵan dzıýdoshylar arasynan Býdapeshtte ıtalııalyq Alıche Bellandıdiń (78 kg) ǵana baǵy jandy. Byltyrǵy álem chempıondarynyń birazy tuǵyrdan taısa, keıbiri bul básekede boı kórsetpedi. Italııanyń myqtylary Assýnta Skýtto (48 kg) men Alıche Bellandıden bólek, japonııalyq Ýta Abe (52 kg), Harýka Kadzıý (63 kg), Sıho Tanako (70 kg), grýzııalyq Eterı Lıpartelıanı (57 kg), ońtústikkoreıalyq Kım Ha Iýn (+78 kg) altynnan alqa taqty.
Jigitterdiń joly bolmady
Býdapeshttegi básekede elimizdiń namysyn 12 balýan qorǵady. Solardyń arasynan, joǵaryda aıtqanymyzdaı, Ábıba Ábýjaqynova ǵana jankúıerlerin qýantty.
Tájirıbeleri ábden tolysqan Maǵjan Shamshadın (60 kg) men Ǵusman Qyrǵyzbaev (66 kg) jaqsy kúresti. Ásirese Maǵjannyń tusaýkeser kezdesýinde Olımpıadanyń qola júldegeri, álem chempıony, ıspanııalyq Fransısko Garrıgosty 10 sekýndta ıpponǵa tastaǵany keremet boldy. Ile-shala Eýropa oıyndary men qurlyq chempıonatynyń eki dúrkin júldegeri, belgııalyq Iorre Ferstretenniń tas-talqanyn shyǵardy. Sol kezde «endi bizdiń Maǵjandy eshkim toqtata almaıdy» dep oılaǵan edik, biraq munymyz beker eken. Odan keıin Olımpıada men álem chempıonatynyń qola júldegeri, japonııalyq Rıýdzıý Nagaıama men tatamı qojaıyny Marton Andrasıge jol bergen Syr boıynyń saıypqyrany jetinshi orynda qalyp qoıdy. Ǵusman da eki kezdesýinde jeńiske jetip, úshinshisinde tájikstandyq Nuralı Emomalıge ese jiberdi. Jubanysh beldesýinde Japonııanyń juldyzy Hıfýmı Abeden jeńildi. Sóıtip, ol da jetinshi oryndy qanaǵat tutty. Qalǵan jerlesterimiz jarystyń alǵashqy satylarynan da asa almady.
Qazyrbek úshin qýandyq
Majarstanda 60 kg salmaqta saıysqa túsken Qazyrbek Ioolktiń ónerine dán rıza boldyq. Mońǵolııada týyp-ósken qazaqtyń qaısar uly óziniń tabandylyǵy men jankeshtiliginiń arqasynda jeńis tuǵyryna kóterildi. Onyń reseılik Aıýb Blıevke ǵana áli jetpedi. Amerıkalyq Djonatan Iýang, ekvadorlyq Djonatan Benavıdes, jarys qojaıyny Fechko Chanad, brazılııalyq Mıshel Avgýstodan basym tústi. Osylaısha, Qazyrbek qola medaldy moınynda jarqyratty. Qazirgi kezde IJF reıtınginde 63-orynda turǵanyn, kúni búginge deıin mundaı joǵary deńgeıdegi jarystarǵa qatyspaǵanyn eskersek, Býdapeshtte Ioolk úlken erlik jasady dep aıtýǵa tolyq negiz bar. Batyr ul Baıan-О́lgeıge oralǵanda jergilikti qazaqtar Qazyrbekke erekshe syı-qurmet kórsetip, temir tulpar mingizdi.
Býdapesht bozkileminde taǵy bir qazaq kúsh synasty. Ol – Aıman Jeńis. Qytaıdyń qazaǵy +78 kg salmaq dárejesinde kúresip, alǵashqy aınalymda estonııalyq qarsylasyn taza utty. Odan keıin Jeńistiń joly Romana Dıkomen qıysty. Olımpıadada 2 altyn (komandalyq saıys) men 2 qola (jekelegen saıys), álem chempıonatynda 1 altyn men 1 qola, Eýropa birinshiliginde 5 altyn alǵan saqa sportshy qandasymyzdy esh qınalmaı utty. Alaıda Aımanǵa ókpe joq. 21 jastaǵy balýan jat elde óziniń myqtylyǵyn moıyndatyp, bas komandanyń qataryna qabyldandy. Halyqaralyq dodalarda da Jeńis eleýli tabystarǵa qol jetkizip úlgerdi. Bıyl Azııa chempıony atanyp, Tashkent grand-sleminde qola medal ıelendi. Olaı bolsa, aldaǵy ýaqytta da Aıman Jeńis jankúıerlerin jarqyn jeńisterimen qýantatynyna kúmánimiz joq.
