Onda farmasevtıka salasyndaǵy, atap aıtqanda, halyq úshin basym baǵyttar boıynsha otandyq dári-dármek óndirisi úlesin ulǵaıtý salasyndaǵy yntymaqtastyqty ári qaraı damytý máseleleri talqylandy.
Taraptar Shymkent qalasyndaǵy «Hımfarm» AQ zaýytyn jańa óndiristik ǵımarattar men zerthanalyq alańdar salý arqyly keńeıtý jobasynyń júzege asyrylý barysyn qarady. Naryq suranysyn eskere otyryp, kásiporyn Santo Member of Polpharma Group saýda belgisimen jylyna 2 mlrd birlik dárilik zattar óndirisin ıgerýdi josparlap otyr. Investısııa kólemi 62,6 mln dollardy quraıdy, 300 jańa jumys ornyn ashý kózdelgen.
Jergilikti óndiristi damytý úshin basym terapııalyq baǵyttar retinde: týberkýlez, sozylmaly vırýsty S gepatıti jáne baýyr sırrozy, qaterli isikter, qant dıabeti, psıhıkalyq buzylýlar, ortalyq júıke júıesi, júrek-qan tamyrlary aýrýlary jáne basqa da áleýmettik mańyzy bar aýrýlar tańdaldy.
«Memleket basshysy Qasym-Jomart Toqaev otandyq dári-dármek óndirisi men medısınalyq maqsattaǵy buıymdar óndirisin damytýdyń mańyzdylyǵyn erekshe atap ótti. Bul baǵytta biz dárilik zattar men medısınalyq maqsattaǵy buıymdardyń otandyq óndirisi úlesin arttyrýǵa umtylyp kelemiz. Farmasevtıkalyq ónim óndirisin lokalızasııalaýdy yntalandyrý sharalaryn júzege asyryp jatyrmyz. Medısınalyq tehnologııalar transferti jáne ımportty almastyrý, ǵylymı jáne eksporttyq áleýetti damytý basym baǵyt sanalady. Qazaqstan Úkimeti áleýmettik mańyzdy óndiristerdiń osyndaı aýqymyn júzege asyrýǵa múddeli jáne ınvestısııalyq jobany ýaqtyly iske qosý úshin qajetti qoldaý sharalaryn qamtamasyz etedi», dep atap ótti O.Bektenov.
Polpharma Group baqylaýshylar keńesiniń tóraǵasy Ejı Starak Qazaqstandaǵy ınvestısııalyq ahýalǵa joǵary baǵa berip, jańa óndiris zamanaýı tehnıkamen jabdyqtalatynyna jáne óndiriletin ónim farmasevtıka ónerkásibi salasyndaǵy barlyq halyqaralyq standarttarǵa tolyq sáıkes keletinin aıtty.
Kelissózder qorytyndysy boıynsha taraptar ózara tıimdi yntymaqtastyqty nyǵaıtýǵa nıetti ekenderin jetkizdi. Premer-mınıstr Densaýlyq saqtaý mınıstrligi men Shymkent qalasy ákimdigine qysqa merzimde Jańa zamanaýı dárilik zattar óndirisi qurylysyna ınvestısııa týraly kelisim jobasyn daıyndaýdy tapsyrdy.
Aıta keteıik, «Hımfarm» AQ kásipornyna Polpharma Group ınvestısııalarynyń jalpy kólemi 130 mln dollardan asty, 1 300-den astam jumys orny ashyldy. Zaýyt 12 farmakoterapııalyq topty qamtıtyn 280-nen astam jalpy preparat shyǵarady. О́ndiris GMP jáne GDP halyqaralyq standarttary boıynsha sertıfıkattalǵan. О́nimder Reseı, Qyrǵyzstan, Mońǵolııa, О́zbekstan, Tájikstan, Túrikmenstan jáne basqa da elderge jetkiziledi. О́tken jyly paıdalanýǵa berilgen Sapa jáne ınnovasııa ortalyǵy Qazaqstandaǵy ǵylymı-zertteý bazasyn kúsheıte otyryp, jańa preparattardy derbes ázirleýge jáne engizýge múmkindik beredi. Otandyq farmasevtıka úshin kadrlar daıarlaýda elimizdiń bilim berý mekemelerimen yntymaqtastyq júrgizilýde.
