«Biz birgemiz» qaıyrymdylyq qorynyń negizin qalaýshylardyń biri Perızat Qaıratqa qatysty qylmystyq is sotqa túsken joq. Eger Perızat Qaıratqa qatysty sońǵy qylmystyq is sotqa joldansa jáne qoǵam men zańgerler qaýymdastyǵynan suranys bolsa, sot otyrystaryn tikeleı efırde kórsetý máselesi qaralýy múmkin», delingen Joǵarǵy sottyń resmı jaýabynda.
Buǵan deıin Qarjy monıtorıngi agenttigi Qaırat Perızat pen onyń anasy Ǵaını Alashbaevaǵa qatysty alaıaqtyq, sondaı-aq qylmystyq jolmen alynǵan aqsha men múlikti zańdastyrý faktileri boıynsha sotqa deıingi tergeýdi aıaqtaǵany habarlanǵan bolatyn. Bıylǵy jyldyń 19 naýryzynan bastap proseske qatysýshylar 109 tomnan turatyn qylmystyq is materıaldarymen tanysa bastaǵan. Urlanǵan qarjynyń jalpy kólemi — 3,5 mlrd teńge. Qylmystyq jolmen alynǵan, jalpy quny 865 mln teńge bolatyn barlyq múlikke tyıym salynǵan.
QR Qarjy monıtorıngi agenttigi tóraǵasynyń orynbasary Jeńis Elemesov Májiliste ótken brıfıngte Perızat Qaırat isi boıynsha sot qashan bastalatynyn aıtty.
«Qylmystyq is aıaqtaldy. Qazir prosestiń qatysýshylary qylmystyq is materıaldarymen tanysyp jatyr. Ol bul prosesti ádeıi sozǵandyqtan, arnaıy grafık bekitildi, ol 9 maýsymda aıaqtalady. Tanysý aıaqtalǵannan keıin Qylmystyq-prosessýaldyq kodekske sáıkes, onyń ózi men advokattaryna ótinish bildirýge úsh kún beriledi. Sebebi, tanysyp shyqqan soń, olardyń tarapynan qandaı da bir ótinishter týyndaýy múmkin», dedi Jeńis Elemesov.
