Foto: Densaýlyq saqtaý mınıstrligi baspasóz qyzmeti
Byltyrǵy jyly el Prezıdenti medısına jáne farmasevtıka qyzmetkerleriniń quqyqtary men múddelerin qorǵaýǵa baǵyttalǵan zańǵa qol qoıdy. Bul – densaýlyq saqtaý salasyndaǵy mamandardyń kásibı bedelin arttyryp, olardyń qoǵamdaǵy ornyn naqtylaýǵa jasalǵan mańyzdy qadam. Jańa zań aıasynda medısına qyzmetkerleriniń mártebesi zańnamalyq turǵydan bekip, olardyń qaýipsiz eńbek etýine, kásibı ósýine, materıaldyq jáne áleýmettik turǵyda qoldaýǵa kepildik berildi.
Búginde elimizde medısına kadrlaryn aýyldyq jerlerge tartý men bekitýge arnalǵan memlekettik qoldaý sharalary sátti iske asyrylyp jatyr. Bul sharalar úsh negizgi baǵytty qamtıdy:
-
áleýmettik kepildikter berý (mysaly, kóterme járdemaqy, qyzmettik baspana máselesin sheshý);
-
turǵyn úı jaǵdaıyn jaqsartý (baspanamen qamtamasyz etý, ıpotekalyq jeńildikter);
-
materıaldyq yntalandyrý (jalaqydan tys qosymsha qarjylaı qoldaý, saqtandyrý júıesi).
2024 jyldyń qazan aıynan bastap 186 myńnan astam medısına qyzmetkerin qamtyǵan kásibı jaýapkershilikti saqtandyrý júıesi engizildi. Bul – dárigerdiń qateligi úshin jalǵyz ózi emes, memleket te belgili deńgeıde jaýapkershilik kóteretinin bildiredi. Júıe mamanǵa qorǵan bolýmen qatar, halyq senimin de kúsheıtedi.
Eldi mekenderge baryp, uzaq merzimge eńbek etýge bel býǵan dárigerlerge memleket aıryqsha kóńil bólip otyr. Atap aıtqanda, tapshy mamandyq ıeleri aýylǵa kemi 5 jylǵa barǵan jaǵdaıda 100 ETJ (ıaǵnı shamamen 8,5 mln teńge) kóleminde birjolǵy járdemaqy alady. Qazirdiń ózinde 254 dáriger jalpy somasy 2,1 mıllıard teńgeden astam tólem alyp, shalǵaıdaǵy aýyldardyń tynysyn keńeıtýge jol ashty.
Júrgizilgen sharalar óz nátıjesin bere bastady. 2024 jyldyń qorytyndysy boıynsha dárigerler tapshylyǵy 3 986 birlikti qurady, bul ótken jylmen salystyrǵanda 20%-ǵa tómen. Al orta medısınalyq personal boıynsha tapshylyq 4 230 birlikten sál asqanymen, bul da 7%-ǵa tómendegen. Bul – júıeli jumystyń jáne tıimdi kadrlyq saıasattyń kórsetkishi.
Búgingi tańda elimizde, barlyq vedomstvolyq mekemelerdi qosa eseptegende, 275 myńǵa jýyq medısına qyzmetkeri eńbek etedi. Onyń ishinde:
-
83 myńnan astamy – dárigerler;
-
191 myńǵa jýyǵy – orta medısınalyq mamandar.
Densaýlyq saqtaý birinshi vıse-mınıstri Tımýr Sultanǵazıevtiń aıtýynsha, sońǵy úsh jylda dárigerler sany 2%-ǵa, al orta medısınalyq qyzmetkerler sany 0,5%-ǵa artqan. Eń bastysy – bul kórsetkishter ekonomıkalyq yntymaqtastyq pen damý uıymy elderiniń ortasha deńgeıinen asyp túsip otyr, ıaǵnı elimizdiń medısınalyq kadrmen qamtylýy halyqaralyq standarttarǵa saı kele bastaǵan.
Bul kórsetkishter densaýlyq saqtaý júıesin ornyqty damytýǵa, onyń ishki turaqtylyǵyn nyǵaıtýǵa, ári aýyldaǵy aǵaıynnyń sapaly medısınalyq kómekke qol jetkizýine keń jol ashyp otyr. Densaýlyq saqtaý mınıstrligi aldaǵy ýaqytta da medısına kadrlaryn qoldaý men qorǵaýǵa, olardyń kásibı áleýetin arttyrýǵa baǵyttalǵan keshendi reformalardy jalǵastyrmaq.
