Foto: CTS
Birinshi kezeń – bazalyq teorııalyq kýrs – Astanada ótkizildi. Qazirgi tańda Tıanszınde oqytý jalǵasyp jatyr: munda tereńdetilgen teorııa, tájirıbe jáne óndiristik tájirıbeden ótý kózdelgen. Keıin Astanada qorytyndy kezeń – LRT vagondarynda tájirıbeden ótý jáne tikeleı jumysqa kóshý josparlanyp jatyr.
Baǵdarlamanyń maqsaty – LRT júıesinde vagondardy qaýipsiz, tıimdi jáne derbes júrgize alatyn, tehnıkalyq qyzmet kórsete alatyn jáne qajet bolǵan jaǵdaıda aqaýlardy joıa alatyn mamandardy daıyndaý.
Astanadaǵy aldyńǵy oqytý kezeńderinde teorııalyq sabaqtardy Tıanszın metropolıteni men Chjenchjoý temirjol kásibı-tehnıkalyq ınstıtýtynyń (Qytaı Halyq Respýblıkasy) oqytýshylary júrgizdi. Al Tıanszınde sabaqtardy Tıanszın metrosynyń mamandary júrgizip jatyr.
Oqytý baǵdarlamasy 10 qyrkúıekke deıin jalǵasady. Baǵdarlama aıaqtalǵan soń qatysýshylarǵa biliktiligin rastaıtyn sertıfıkattar tabystalady.
Apattyq jaǵdaılardy úlgileý úshin qytaılyq tarap Astana qalasynyń klımattyq jáne paıdalaný jaǵdaılaryna beıimdelgen jańa sımýlıasııalyq baǵdarlamalar ázirlegen. Tájirıbe arnaıy oqý alańynda ótip jatyr, onda tótenshe jaǵdaılardaǵy áreketterdi pysyqtaýǵa jáne praktıkalyq daǵdylardy bekitýge erekshe kóńil bólinedi. Qorytyndy kezeń naqty jelilerde jumys isteýdi, kólik júıesin synaqtan ótkizýdi jáne shynaıy paıdalanýǵa barynsha jaqyn jattyǵýlardy qamtıdy.
«Operatorlardy oqytý – Astanadaǵy LRT jobasyn iske qosýǵa baǵyttalǵan mańyzdy qadam. Biz tek ozyq tehnologııalardy engizýdi ǵana emes, olardy bilikti mamandardyń tıimdi paıdalanýyn qamtamasyz etýge de umtylamyz. Zamanaýı oqý quraldaryn paıdalaný, túrli ssenarıılerdi modeldeý jáne tótenshe jaǵdaılarda áreket etýdi pysyqtaý – bolashaq operatorlarǵa qajetti daǵdylardy meńgerýge múmkindik beredi», dep atap ótti «City Transportation Systems» JShS basqarýshy dırektory Baýyrjan Aıthojın.
Oqytý LRT qurylysy boıynsha kelisimshart aıasynda jáne bas merdiger – «China Railway Asia-Europe Construction Investment» kompanııasy tarapynan júzege asyrylady.
