Foto: Ashyq derekkóz
Sessııanyń basynda Memleket basshysy Qasym-Jomart Toqaev depýtattardyń jumysyna serpin bergen bolatyn. Joldaýlarynda, saılaýaldy baǵdarlamasynda jáne Ulttyq quryltaı otyrystarynda aıtylǵan bastamalardy iske asyrý – depýtattar úshin basty mindetterdiń biri boldy.
Áleýmettik baǵyttaǵy bastamalar
Mindetti áleýmettik medısınalyq saqtandyrý júıesine qatysty tásilder qaıta qaralyp, saqtandyrylmaǵan azamattarǵa da alǵash júgingende tegin bazalyq medısınalyq kómek alý múmkindigi saqtaldy. Onkologııalyq skrınıngter tegin medısınalyq kómektiń kepildik berilgen kólemine engizildi. Sonymen qatar, estý qabileti nashar jandar, ásirese balalar, jergilikti bıýdjet esebinen estý apparatymen qamtamasyz etiledi.
Balalar quqyǵyn qorǵaý baǵytynda kásibı otbasy ınstıtýty engizildi. Bul qıyn jaǵdaıǵa tap bolǵan balalardyń balalar úıine túspeı, otbasynda tárbıelenýine múmkindik beredi. Sonymen qatar, jekemenshik mektepterde de ystyq tamaqpen qamtý máselesi sheshimin tapty.
«Keleshek» erikti jınaqtaý júıesi arqyly balalardyń sapaly bilim alý múmkindikteri keńeıedi. Halyqaralyq ǵylymı jarystardyń jeńimpazdaryna «Bolashaq» baǵdarlamasy aıasynda konkýrssyz granttar alý múmkindigi berildi.
Quqyqtyq sala men ishki qaýipsizdik
Qyzmettik mindetin atqarý kezinde qaza bolǵan 530 polısııa qyzmetkeriniń otbasyna aı saıyn járdemaqy tóleý máselesi sheshildi. Quqyq qorǵaý organdary qyzmetkerlerine turǵyn úı tólemderi qarastyryldy.
Zańnamalyq deńgeıde ınternet-alaıaqtyq, dropperlik áreketter úshin jaza kúsheıtildi. Nekege májbúrleý men adamnyń bet-álpetin tanýǵa kedergi keltiretin kıim kııýge tyıym salyndy. Esirtki taratýshylar men alǵash ret súringen jastar arasyndaǵy aıyrmashylyq naqty belgilenip, 3 myńnan astam is qaıta qaraldy.
Sonymen qatar Konstıtýsııanyń 30 jyldyǵyna oraı Raqymshylyq jasaý týraly zań qabyldanyp, Memleket basshysy oǵan qol qoıdy. Bul zań 15 myń azamattyń jaza merzimin qysqartýǵa, 2 myńǵa jýyq adamnyń bostandyqqa shyǵýyna múmkindik beredi.
Ekonomıka jáne salyq saıasaty
Sessııa barysynda jańa Bıýdjet kodeksi qabyldanyp, bıýdjet prosesi jeńildetildi. Ulttyq qor aktıvterin basqarý tásilderi qaıta qaraldy. О́ńirlerdiń qarjylyq derbestigi artyp keledi.
Eń qyzý talqylanǵan qujat – Salyq kodeksi. Qujat azamattar men kásipkerlerdiń múddesin eskere otyryp qabyldandy. Bul rette salyq aýyrtpalyǵyn arttyrý esebinen bıýdjet kirisin ulǵaıtpaý prınsıpi saqtaldy.
Sý jáne halyqaralyq saıasat
Sý resýrstaryn basqarýǵa qatysty jańa Sý kodeksi qabyldanyp, sý únemdeý mádenıetin qalyptastyrý kózdeldi. Sonymen qatar, 36 halyqaralyq shart pen kelisim ratıfıkasııalandy. Túrkitildes memleketter Parlamenttik Assambleıasyna tóraǵalyq etý kezegi Qazaqstanǵa ótti.
Parlamenttik baqylaý men qoǵamdyq qatysý
Sessııa barysynda Joǵary aýdıtorlyq palata tóraǵasynyń eki esebi tyńdaldy. Aýyl sharýashylyǵy men dári-dármekpen qamtamasyz etý salalaryndaǵy sýbsıdııalar máselesi kóterildi. Sonymen qatar, 461 depýtattyq saýal joldandy. Májilis depýtattary óńirlerde 2 myńǵa jýyq azamatty qabyldady.
AES salý boıynsha respýblıkalyq referendýmǵa daıyndyq, Prezıdenttiń saıası reformalaryn júzege asyrý, Uly Jeńis ardagerlerine taǵzym – bul sessııanyń eleýli kezeńderi boldy.
Kelesi sessııa mindetteri
Kelesi sessııada Májilis Qurylys kodeksi, quqyq buzýdyń aldyn alý, tutynýshylardyń quqyqtaryn qorǵaý, bank qyzmeti jáne basqa da mańyzdy zańdardy qabyldaýdy josparlap otyr.
Sóz sońynda Májilis depýtattary óńirlerge baryp, saılaýshylarmen kezdesip, naqty máselelerdi talqylaýǵa kirisedi Palata Tóraǵasy áriptesterine atqarǵan eńbekteri úshin alǵys aıtyp, BAQ ókilderine obektıvti jumys úshin rızashylyǵyn bildirdi.
«Barshańyzǵa el ıgiligi jolyndaǵy jaýapty iste myqty densaýlyq, tolaıym tabys tileımin», dedi ol.
