Baǵdarlama sheńberinde qyzmetter mindetti áleýmettik medısınalyq saqtandyrý júıesi arqyly tegin kórsetilip keledi. Bul – áleýmettik ádilettiliktiń jáne medısınalyq kómektiń teń qoljetimdiliginiń naqty kórinisi. Jalpy óńirde ana men bala densaýlyǵyn saqtaý basty áleýmettik basymdyqtardyń biri. Bul baǵytta óńirde keshendi sharalar júzege asyrylyp, naqty nátıjelerge qol jetkizilýde.
Oblystyq densaýlyq saqtaý basqarmasynyń basshysy Ashan Baıdývalıevtiń aıtýynsha, sońǵy eki jylda ana men bala óliminiń kórsetkishteri turaqty túrde tómendegen. Bul oń dınamıka profılaktıkalyq skrınıng, perınataldyq kómek jáne kadr daıyndyǵy júıesindegi sapaly ózgeristerdiń nátıjesi. Búginde óńirde prenataldyq skrınıngpen qamtý deńgeıi 88%-ǵa jetken. Bul maqsatta 47 ÝDZ mamany oqytylyp, onyń 12-si Ulybrıtanııadaǵy Fetal Medicine Foundation sertıfıkatyna ıe bolǵan. Osy sharalardyń nátıjesinde týa bitken damý aqaýlarynyń erte dıagnostıkasy 4%-ǵa artqan.
Aıta ketelik, halqy búginde 2,2 mıllıonnan asatyn oblysta reprodýktıvti jastaǵy áıelder sany – 433 myńnan astam, al 18 jasqa deıingi balalar – 900 myńǵa jýyq. Jyl saıyn orta eseppen 54 myńǵa jýyq sábı dúnıege keledi.
