- Italııada ótken «Djıro dell’Apennıno» dodasy «Astana» klýbynyń veloshabandozy Dıego Ýlıssıdiń jeńisimen aıaqtaldy. Novı Lıgýre men Djenoa aralyǵyn qamtyǵan 198,5 shaqyrymdyq qashyqtyqty ol 5 saǵat 03 mınýt 35 sekýndta júrip ótti. Ekinshi oryndy ýkraınalyq Andreı Ponomar («Petrolike») ıelense, «Astananyń» taǵy bir múshesi Sımone Velasko úshinshi satyǵa taban tiredi.
- Polsha astanasy Varshavada «Konopacka Warsaw Classic» halyqaralyq týrnıri márege jetti. Jarysta 185 santımetrlik bıikti baǵyndyrǵan Krıstına Ovchınnıkova kúmis medal ıelendi. Jerlesimiz ýkraınalyq Iýlııa Levchenkodan (192 sm) qalyp qoıdy. Úshinshi oryndy polshalyq Alısııa Vysoska (185 sm) ıelendi.
- Mınskide baıdarka men kanoe esýden «Úzdikter týrnıri» aıaqtaldy. Baıdarka-ekiliktiń 500 metrlik básekesinde Tatıana Tokarnıskaıa men Olga Shmeleva qola medal enshiledi.
- «Ýımbldon» qarsańynda biraz tynyǵyp alýdy jón kórgen Aleksandr Býblık Istborndegi ATR 250 týrnırine qatysýdan bas tartty. Elimizdiń eń úzdik tennısshisin bul jarysta amerıkalyq Djenson Brýksbı almastyrdy. Iýlııa Pýtınseva Germanııanyń Bad-Hombýrg qalasyndaǵy WTA 500 dodasynyń alǵashqy aınalymynda grekııalyq Marııa Sakkarıge ese jiberdi.
- UFC-diń basty juldyzy, asa aýyr salmaqtaǵy chempıon, amerıkalyq Djon Djons mansabyn aıaqtaǵannan keıin uıym P4P reıtınginiń jańartylǵan nusqasyn jarııalady. Myqtylar kóshin áli de reseılik faıter Islam Mahachev bastap tur. Odan keıingi satylarǵa Merab Dvalıshvılı, Ilıa Topýrııa, Drıkýs Dıý Plessı, Magomed Ankalaev, Aleksandr Volkanovskı, Djek Della Maddalena, Tom Aspınall, Aleshandre Pantoja, Aleks Pereıra jaıǵasty. Jekelegen salmaq dárejeleri boıynsha TOP-10-dyqta qazaqtyń eki sańlaǵy bar. Olar – Shavqat Rahmonov (3-oryn) pen Asý Almabaev (8-oryn).
- 17–19 qazan aralyǵynda shaıbaly hokkeıden Qurlyqtyq kýboktiń jalaýy jelbireıdi. Alǵashqy kezeńde Latvııanyń «Mogo», Majarstannyń «Býdapesht», Rýmynııanyń «Georgenı», Ýkraınanyń «Kremenchýg», Lıtvanyń «Hokkeı Panks», Horvatııanyń «Sısak», Serbııanyń «Srvena Zvezda», Estonııanyń «Narva» klýbtary kúsh synasady. Olar eki topqa bólinedi. Ár toptyń jeńimpazy ekinshi kezeńge joldama alady. Qarasha aıynda shymyldyǵy túriletin jarysta olardy Polshanyń «Katovıse», Ulybrıtanııanyń «Nottıngem Panterz», Danııanyń «Hernıng Blıý Foks», Fransııanyń «Anje Daks», Italııanyń «Kortına», О́skemenniń «Torpedo» komandalary kútip tur. Fınaldyq oıyndar úzdik tórt komandanyń qatysýymen kelesi jyldyń 15–18 qańtar aralyǵynda ótedi.
