«Amanat» partııasy jýrnalıster arasyndaǵy osy respýblıkalyq baıqaýdy 16 jyl qatarynan ótkizip keledi. Osy jyldar aralyǵynda atalǵan is-shara elimizdiń aqparat salasyndaǵy mańyzdy oqıǵaǵa aınaldy. Májilis spıkeri, «Amanat» partııasynyń tóraǵasy Erlan Qoshanov baıqaý jeńimpazdary men buqaralyq aqparat quraldarynyń barsha ókilin aldaǵy kásibı merekelerimen quttyqtady.
«Keshe ǵana Memleket basshysy Qasym-Jomart Toqaev barsha jýrnalıster qaýymyn quttyqtap, mártebeli marapattar tapsyrdy. Prezıdent ulttyq medıa halyqtyń úni, al jýrnalıst jasampazdyq jarshysy ekenin erekshe atap ótti. Rasymen de, jýrnalıst – qoǵamnyń aınasy, shyndyqtyń shyraqshysy, halyqtyń amanatyn arqalaýshy. Munyń bári buqaralyq aqparat quraldarynyń qoǵamdaǵy róli men alar ornyn aıqyndaıdy. Sizder – qoǵamdyq pikir qalyptastyrasyzdar. Sondyqtan sizderge degen yqylas ta, iltıpat ta, artylatyn senim de joǵary», dedi ol.
Sondaı-aq E.Qoshanov búginde «Amanat» partııasy saılaýaldy baǵdarlamasyn júzege asyrý aıasynda BAQ-pen tyǵyz baılanysta jumys istep kele jatqanyn jetkizdi. Sonymen qatar ol jýrnalısterdiń «Jer amanaty», «Aýyl amanaty», «Qaryzsyz qoǵam» jáne ózge de partııalyq jobalardy júzege asyrýǵa qosqan eleýli úlesin atap ótti. Onyń barlyǵy azamattardyń naqty máselelerin sheshýge baǵyttalǵan.
Májilis spıkeri medıa syılyq arqyly partııa elimiz úshin asa mańyzdy máselelerge BAQ nazaryn aýdaratynyn atap ótti. Bul – Memleket basshysynyń reformalary, tarıhı oqıǵalar, partııalyq jobalar. Bul taqyryptar jýrnalısterge etene jaqyn. Bıyl baıqaýǵa 3 myńǵa jýyq ótinim kelip tústi. Barlyq jumystyń tórtten bir bóligi «Eńbek adamy týraly úzdik materıal» atalymyna tıesili. Sonymen qatar bıyl alǵash ret elimizdiń ekologııalyq kún tártibine úles qosqan júrnalıster úshin «Taza Qazaqstan» arnaıy atalymy, sondaı-aq Konstıtýsııanyń 30 jyldyǵyna arnalǵan atalym taǵaıyndaldy. Aımaqtyq jýrnalıstıkaǵa, sondaı-aq áleýmettik jelilerde qoǵamdyq pikir qalyptastyratyn blogerlerge erekshe nazar aýdaryldy.
Osy oraıda jeńimpazdar qatarynan kórinip, mereıi tasyǵan áriptesimiz, «Qazaq gazetteri» JShS bas dırektorynyń orynbasary Qambar Ahmet «Zań men tártip» – Konstıtýsııasynyń 30 jyldyǵyna arnalǵan úzdik materıal atalymynyń ıegeri atandy. Ol el kóshin alǵa bastaıtyn ıgi isterdi buqaraǵa jetkizýge atsalysyp júrgen jýrnalıster qaýymyn osylaı baǵalap jatqan partııaǵa rızashylyǵyn bildirip, jaqsylyqtyń jarshysy bolatyn jańalyqtardyń kóbeıe berýine tilektes ekenin jetkizdi.
«Televızııa úzdigi» atalymy boıynsha jeńimpaz atanǵan Jiger Sársenniń aıtýynsha, partııa el múddesine adaldyq tanytyp, otandyq jýrnalıstıkaǵa kóp jyl jan-jaqty qoldaý kórsetip kele jatqanyn atap ótti.
Al Amankeldi Qurmet «Alash amanaty» arnaıy atalymyn ıelendi. Onyń materıaly tarıhı jadyny jańǵyrtýǵa, saqtaýǵa jáne ulttyq biregeılik taqyrybyna arnaldy. Onyń aıtýynsha, bul marapat – tek bir maqala úshin emes, jalpy ulttyq qundylyqtar sabaqtastyǵyn nyǵaıtýǵa baǵyttalǵan kásibı qyzmetine berilgen joǵary baǵa.
Sonymen qatar konkýrstyq komıssııanyń sheshimimen bıyl «Amanat medıa syılyǵynyń» kelesideı jeńimpazdary anyqtaldy: «Elimizdegi reformalar týraly úzdik materıal» atalymy – «Tengrinews.kz» saıtynyń tilshi-redaktory Arýjan Dáribaı; «Eńbek adamy týraly úzdik materıal» atalymy – «Qazaqstan» RTRK» AQ derekti fılmder dıreksııasynyń jetekshisi Nurbek Bekbaýov; «Jastar týraly úzdik materıal» atalymy – «El.kz» ınternet-portalynyń aǵa tilshisi Aqmaral Saıpbek; «Aımaq týraly úzdik materıal» atalymy – «Qyzylorda» telearnasy bas redaktorynyń orynbasary Bekzat Esqalıev jáne «Saryarqa» telearnasynyń shef-redaktory Gúlbaqsha Aqajanova; «Partııa jumysy týraly úzdik materıal» atalymy – «31 arna» telearnasyndaǵy «Informbıýro» aqparattyq baǵdarlamasynyń tilshisi Symbat Baıjokenov; «Taza Qazaqstan» – ekologııa men qorshaǵan ortany saqtaý týraly úzdik materıal» atalymy – «Azattyq Rýhy» aqparat agenttiginiń tilshisi Aıagóz Qurmash. Buǵan qosa «Belsendi azamattyq ustanymy úshin» syılyǵy – jýrnalıst ári qoǵam qaıratkeri Láılá Sultanqyzyna tabystaldy.
