Foto: Ashyq derekkóz
Eńbek jáne halyqty áleýmettik qorǵaý mınıstrliginiń málimetinshe, qandastardyń basym bóligi Qytaı (45,8%) jáne О́zbekstannan (41,2%) kelgen. Sondaı-aq Túrikmenstan (5,5%), Mońǵolııa (2,6%), Reseı (2,4%) jáne basqa elderden (2,5%) kelgen azamattar da bar.
«Osy jylǵy 1 maýsymdaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,1%-dy, eńbekke qabiletti jastan kishi 31%-dy jáne zeınetkerler 8,9%-dy quraıdy. Eńbekke qabiletti jastaǵy qandastardyń ishinen bilim deńgeıi boıynsha 17%-y joǵary bilimdi, 27,4%-y orta kásibı bilimdi, 53,2%-y jalpy orta bilimdi, jáne 2,4% bilim joq», delingen habarlamada.
Etnıkalyq qazaqtar eldiń ár aımaǵyna qonystanyp jatyr. Alaıda eńbek kúshi tapshy aımaqtarǵa, atap aıtsaq Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystaryna basymdyq beriledi. Bul óńirlerge 2025 jylǵa arnalǵan qandastardy qabyldaý kvotasy 2 309 adamdy quraıdy. Jyldyń alǵashqy bes aıynda bul aımaqtarǵa 917 qandas qonys aýdarǵan.
«Atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (275,2 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (59-dan 118 myń teńgege deıin) mólsherinde. Jyl basynan beri 340 qandasqa túrli qoldaý sharalary kórsetildi. Atap aıtqanda, 163 adam turaqty jumysqa ornalastyryldy», delingen habarlamada.
Aıta keteıik, Soltústik óńirlerge erikti kóshý tetikteriniń tıimdiligin arttyrý maqsatynda jumys berýshilerdi yntalandyrýǵa baǵyttalǵan jańa ınstıtýsıonaldyq sharalar qabyldanǵan. Onyń aıasynda turǵyn úı satyp alý nemese salý, sondaı-aq ıpotekalyq nesıeler boıynsha bastapqy jarnany jabý úshin ekonomıkalyq utqyrlyq sertıfıkaty engizilgen. Bul sertıfıkat bir otbasyǵa turǵyn úı qunynyń 50%-yna deıin, nemese 4,56 mln teńgege deıin qaıtarymsyz negizde beriledi.
