Osyndaı syılyqtyń tóresimen Jýrnalıster kúni qarsańyndaǵy marapattar tıegi aǵytyldy. Prezıdent óz qolymen tabystaǵan dıplomda bul syılyq Talǵat Batyrhanǵa «Otandyq jýrnalıstıkany damytýǵa qosqan úlesi úshin berildi» dep jazylǵan. Memleket basshysynyń osy baǵasy – qarymdy qalamgerdiń ult baspasózindegi ónimdi de ónegeli eńbek jolynyń aıqyn kórsetkishi. Kózi qaraqty oqyrman Talǵat Batyrhannyń esimi men salmaqty maqalalaryna «Astana aqshamy», «Aıqyn», «Egemen Qazaqstan» basylymdary arqyly qanyqty.
Sondaı-aq dál osyndaı syılyqty «Qazaq gazetteri» JShS-na qarasty «Kazahstanskaıa pravda» gazetiniń bólim meńgerýshisi Iýlııa Mager de ıelendi. Osy kúni Prezıdenttiń BAQ salasyndaǵy Alǵysy seriktestik quramyndaǵy «Ana tili» gazetiniń ujymyna da berildi.
«Qazaq gazetteri» JShS bas dırektorynyń orynbasary Qambar Ahmet Prezıdent Jarlyǵymen memlekettik nagrada – «Eren eńbegi úshin» medalimen marapattaldy. Mereke qarsańynda «Amanat» partııasy da jýrnalıster arasynda ótkiziletin dástúrli respýblıkalyq «Amanat medıa» syılyǵynyń qorytyndysyn shyǵaryp, túrli atalym boıynsha 11 jeńimpazdy anyqtady. Qambar Ahmet osy baıqaý jeńimpazdarynyń qatarynan tabyldy. Áriptesimiz «Zań men tártip» – Konstıtýsııanyń 30 jyldyǵyna arnalǵan úzdik materıal» atalymynyń ıegeri atanyp otyr.
Sondaı-aq gazetimizdiń Aqmola oblysyndaǵy menshikti tilshisi Baıqal Baıádil Jýrnalıster odaǵynyń sheshimimen «Qazaqstannyń qurmetti jýrnalısi» ataǵyna ıe boldy. Buǵan qosa ol da «Eren eńbegi úshin» medalimen marapattaldy. Dál osyndaı medalge Shyǵys Qazaqstan oblysyndaǵy menshikti tilshimiz Mereı Qaınaruly da ıe boldy.
Al gazetimizdiń ınternet-redaksııasynyń jetekshisi Dınar Kerim memlekettik nagradalardyń biri – «Shapaǵat» medalin ıelendi.
Áriptesterimiz elimizdiń zań shyǵarýshy organy – Parlamenttiń qos palatasy jarııalaǵan baıqaýda da oljaly shyqty. «Egemen Qazaqstan» gazeti saıasat jáne quqyq bóliminiń aǵa tilshisi Gúlnar Joljan Senat uıymdastyrǵan «Parasat» baıqaýyndaǵy basylymdyq BAQ-taǵy úzdik jarııalanymnyń jeńimpazy atansa, osy bólimniń tilshisi Zeıin Erǵalı «Úzdik baspa jarııalanymy úshin» atalymynda Májilistiń «Parlament sózi» syılyǵyna ıe boldy.
Aǵa tilshi Eskendir Zulqarnaı Jýrnalıster odaǵy syılyǵynyń laýreaty atandy.
Gazetimizdiń Almaty qalasyndaǵy menshikti tilshileriniń biri Arman Oktıabr Almaty qalasy ákimdigi Qoǵamdyq damý basqarmasy men О́ńirlik Kommýnıkasııalar qyzmeti BAQ ókilderi arasynda uıymdastyrǵan Almatynyń damýyn nasıhattaǵan úzdik jýrnalıster baıqaýynyń «Úzdik jýrnalıst-sarapshy» atalymynyń jeńimpazy atandy.
Almaty oblysyndaǵy menshikti tilshimiz Ulbosyn Isabek pen Jambyl oblysyndaǵy menshikti tilshimiz Tabıǵat Musylmanqul oblys ákiminiń Qurmet gramotasymen marapattalyp, syı-sııapatqa ıe boldy.
