Maǵzumbek Mashaıyquly áli tuǵyrdan taıǵan joq. Jasy 86-ǵa kelse de, qolynan qalamyn tastamaı eńbek etip júr. Onyń jýrnalıstıka salasynda qyzmet istep kele jatqanyna 62 jyl.
«Áli kúnge deıin jumys istep júrmin. Úkimet qyzmetimdi elegen shyǵar, «jumys isteı berińiz» dep ruqsat berdi. О́mirimniń basym bóligin ótkizgen gazet meniń tárbıeshim boldy. Halyqtyń arasynda eldiń tynys-tirshiligin bilip, óziń de sabaq alyp, sodan eseıedi ekensiń. Jýrnalıst – óte qurmetti mamandyq. 40 jyl «Ulytaý óńiri» gazetinde redaktor, 14 jyl redaktordyń orynbasary boldym. Qazir keńesshi bolyp jumys isteımin ári maqala jazyp turamyn. Gazettegi qyzmet meniń ataǵymdy shyǵarýǵa yqpal etti, kóptegen aqyn-jazýshy – Muhamedjan Qarataev, Syrbaı Máýlenov, Ǵafý Qaıyrbekov, Qadyr Myrzaáli, Zeıtin Aqyshev, Aqseleý Seıdimbekov sııaqty qalamgerlermen birge júrdim, dos, syrlas boldym. Meni Almatyǵa alyp ketemiz degenderden bas tarttym. Olarǵa ózimniń týǵan jerimde, ózimniń ósip-óngen ortamda, qasıetti Ulytaýymnyń baýyrynda eńbek ete beremin dedim. Elimizdiń bas basylymy «Egemen Qazaqstan» – myqty gazet. Áli kúnge deıin maqala jiberip turamyn. «Sosıalıstik Qazaqstan» gazeti bolyp turǵanda da, maqala jazyp turdym. El gazeti kóptegen azamatty tárbıelep shyǵardy. Halyqtyń muń-muqtajyn joqtady. Sondyqtan barlyq qalamgerge shyǵarmashylyq tabys tileımin», dep aq batasyn berdi abyz aqsaqal.
Buqaralyq aqparat quraldary qyzmetkerleriniń kúni qarsańynda Jezqazǵan qalasynda Ulytaý oblysy ákimi Dastan Ryspekov «Ūlar» syılyǵyn tabystap, sol qatarda Ulytaý oblysy jýrnalıstıkasyn damytýǵa qosqan úlesi úshin 1 mln teńge aqshalaı syıaqymen Maǵzumbek Mashaıyqulyn marapattady.
Ulytaý oblysy
