Qazir umytyla bastaǵan talaı jádigerdi ulttyq mura retinde dáriptep júrgen basylym tilshisi Beken Qaıratulynyń jazǵanyn izdep júrip oqımyn. Kóne qalalar kómbesi, esimi elge belgili talaı tulǵa tutynǵan múlikter, belgili týyndylardyń bizge beımálim tarıhy týraly maqalalaryn saqtap qoıamyn. Sońǵy bettegi «Ǵalam ǵajaptary» aıdarymen beriletin shaǵyn ǵana dúnıelerde adamnyń tanym aıasyn keńeıte túsetin derek molynan kezdesedi.
Osydan 3 jyl buryn gazette zamanynda balalaryn bilimge baýlyp, qazaq qoǵamyna aıtarlyqtaı yqpal etken Muńaıtpas Lapın áýleti jatqan qorymnyń qaraýsyz qalǵany týraly maqala jarııalandy. Syr topyraǵynda tuńǵysh ret eýropalyq úlgide bilim beretin «Han mektebin» ashqan Muńaıtpas pen onyń áýleti tartqan azap-mehnattyń shet-shegi joq. Olar máńgilik meken tapqan qorymnyń qaraýsyz qalyp, jan-jaǵyn ıt tumsyǵy batpaıtyn sheńgel basyp bara jatqany da janymyzǵa batatyn edi. «Qumda qalǵan qaıratker» atty sol maqala el azamattarynyń jumylyp, aýdan, aýyl ákimdikteriniń kómegimen qorymǵa aparatyn joldy tegistep, qaıratkerdiń basyna belgitas ornatyp, aty óshýge aınalǵan tulǵany qaıtadan halyqqa tanystyrýyna túrtki boldy.
El ishindegi talaı jádigerdi jurtqa tanystyrǵan bas basylymnyń qoǵamnyń rýhanı damýyna qosyp kele jatqan úlesi úlken ekenin aıta alamyz.
Jumabaı BAIZAQULY,
zeınetker
Qyzylorda oblysy,
Syrdarııa aýdany
