«Amanat» partııasy 62 zańǵa bastamashylyq etti

Májilis spıkeri, «Amanat» partııasynyń tóraǵasy Erlan Qoshanov atap ótkendeı, ótken sessııada fraksııa músheleri 62 zańǵa bastamashylyq etti. VIII shaqyrylymda zań jobalaryna barlyǵy 5 300-den asa ózgertýler men túzetýler engizildi. Májilis­tiń jalpy otyrystarynda 626 depýtattyq saýal joldandy. Buǵan qosa bıýdjetti árbir bekitý kezinde depýtattar óńirlerde ınfraqurylymdyq jobalardy júzege asyrý úshin 1,5 trln teńgege deıin túzetýler engizilýine qol jetkizdi. Osylaısha, naqty saılaýaldy ýádeler qarjymen qamtamasyz etilip jatyr.

«Amanat» partııasy Ádiletti Qazaqstandy qurý jolyndaǵy reformalardy júıeli júzege asyryp keledi. Osy úshin biz Memleket basshysynyń bastamalaryna zańnamalyq qoldaý kórsetip jatyrmyz. Onyń barlyǵy ekonomıka ósimin qamtamasyz etýge jáne otandastarymyzdyń ál-aýqatyn jaqsartýǵa baǵyttalǵan. Jalpy, Májiliste qabyldanǵan árbir zań «Amanat» fraksııasy depýtat­tarynyń belsendi atsalysýymen ázirlendi deýge bolady», dedi ol.

Májilis spıkeri depýtattar zań shyǵarý jumysy barysynda memlekettiń halyq aldyndaǵy áleý­­mettik mindettemelerin oryn­daýyna, onyń ishinde aýyldardy aýyzsýmen qamtamasyz etý, áleý­mettik medısınalyq saqtandyrý júıesin reformalaý, turǵyn úı qatynasyn jetildirý­ge basa nazar aýdarǵanyn atap ótti. Buǵan qosa jańadan Bıýdjet, Sý jáne Salyq kodeksteri qabyldandy.

E.Qoshanov azamattardyń naqty máselelerin sheshýge baǵyt­talǵan partııalyq jobalardy júzege asyrýǵa erekshe nazar aýdardy. Atap aıtqanda, «Jer amanaty» komıssııasy 12,5 mln gektar jerdi memleket menshigine qaıtardy. Qaryz qamytyn kıgen 500 myńnan asa adamǵa «Qaryzsyz qoǵam» jobasy aıasynda kómek kórsetildi. Memleket basshysynyń tapsyrmasy boıynsha, bul joba jalpyulttyq sıpatqa ıe boldy. 2 myńǵa jýyq ákim «Ákimder mektebi» arnaıy jobasy aıasynda oqýdan ótti. Partııanyń osy jáne ózge de bastamalary qoǵamda keń qoldaý tapty. Partııa tóraǵasy atap ótkendeı, depýtattar munyń bárin azamattarǵa belsendi túrde túsindirýge tıis.

О́z kezeginde, Májilistegi «Amanat» partııasy fraksııasy jetek­shisiniń orynbasary Pavel Kazan­sev byltyr partııanyń saı­la­ýal­­dy baǵdarlamasyn júzege asyrý boıynsha jol kartasy pýnkt­­­­teriniń úshten ekisi oryn­dal­ǵa­nyn atap ótti. Máselen, azamat­tyq qyzmetshilerdiń jekelegen sanat­­tarynyń jalaqysy 20%-ǵa ósti, medıanalyq tabystan kedeı­lik shegin anyqtaý úshin jańa esepteý júıesi engizildi, Qaraǵandy oblysynda kenshiler men metallýrgter úshin jeńildikpen beriletin ıpotekanyń arnaıy baǵdarlamasy iske qosyldy, Batys Qazaqstan oblysyndaǵy 70 shalǵaı eldi mekenge ınternet tartyldy, t.b.

Májilis spıkeri fraksııa depýtattaryna shekara mańyndaǵy aýdandardy, saıajaı kooperatıvterin damytý máseleleri boıynsha zań jobalaryn ázirleý jumysyn jedeldetýdi tapsyrdy. Olar kelesi sessııada Májiliske engiziledi.

Sonymen qatar aýyldyq aýmaq­tardy keshendi damytýǵa, aýyl­dyq jerlerdegi bilim berý, densaý­lyq saqtaý salalaryn jańǵyr­týǵa jáne ınklıýzıvti orta­ny qamtamasyz etýge baǵyt­tal­ǵan «Baquatty audan» pılot­­tyq joba­synyń tájirıbesin birqatar aýdan­­da taratý josparlanyp otyr. Sondaı-aq depýtattar jas­tar jumyssyzdyǵy máselesin she­shý boıynsha jeke joba ázir­leý­ge nıetti. Bul – ásirese Jumys­shy mamandyqtary jyly óte ózekti.

Jıyn sońynda Májilis spı­keri óńirlerge aldaǵy sapar kezinde depýtattarǵa júkte­letin birqatar mindetti aıqyndady. Sapar barysynda depýtattar óndiristik jáne áleýmettik nysandardy aralap, eńbek ujymdarymen kezdesedi. Son­daı-aq azamattardyń jeke máse­leleri boıynsha qabyldaýlar ót­kizedi. Shalǵaıdaǵy eldi meken­derge erekshe nazar aýdarylady. Halyq qalaýlylary jańadan qabyl­danǵan zańdardyń is júzin­de qalaı jumys isteıtinin jáne olar­dyń jergilikti jerde tur­ǵyn­dar suranysyna qan­sha­lyqty ja­ýap beretinin zert­teıdi. Sondaı-aq depýtattar jańa­dan qabyldanǵan zańdar týraly aı­typ, azamattar kótergen mańyz­dy máselelermen tanysady. Bola­shaqta depýtattar sapar barysynda jı­nalǵan barlyq aqparatty zań shy­ǵarý jumysy kezinde paıdalanady.