Uly Jeńistiń 80 jyldyǵy men Keńes Odaǵynyń Batyry Álııa Moldaǵulovanyń 100 jyldyǵyna oraı uıymdastyrylǵan aıtýyly is-sharaǵa Qazaqstan Qarýly kúshteriniń Bas qolbasshysy, Memleket basshysy Qasym-Jomart Toqaev ta qatysty. Bıyl Qazaqstanmen qatar Ázerbaıjan, Belarýs, Qyrǵyzstan, Reseı, О́zbekstannan kelgen 800-ge jýyq jas baq synaǵan. Olar «Aıbyn daryny» zııatkerlik saıysy, «Smart Sarbaz» tehnologııalyq jobalar baıqaýy, «Aıbyn juldyzy» shyǵarmashylyq konkýrsy, pnevmatıkalyq myltyqpen atý, avtomat bólshekteý jáne jınaý, áskerı-taktıkalyq oıyndar men sporttyq jarystar boıynsha túrli saıysqa tústi.
Bul jıynda Abaı oblysynyń sarbazdary erekshe kózge tústi. Jarma aýdany, Qalbataý aýylyndaǵy Maıakovskıı mektebiniń 10-synyp oqýshysy Nıka Brıtner utqyrlyq tanytyp, «Úzdik jas sarbaz» atandy. Úzdik sarbaz pnevmatıkalyq vıntovkamen dál kózdeýde, avtomat bólshekteý men jınaýda shashasyna shań juqtyrmaı, shalqasynan jatyp keýdeni bir mınýtta 88 ret kóterip, «Aıbyn» tarıhynda jańa rekord ornatty. Nıka áskerı sheberligi men eptiligin tanytyp qoımaı, «Aıbyn Juldyzy» sahnasynda óner kórsetip, shyǵarmashylyq qabileti men talantyn da kópke pash etti. Abaı eliniń namysyn qorǵaǵan jas sarbaz jeńisin Abaı Qunanbaıulynyń 180 jyldyǵy men Álııa Moldaǵulovanyń 100 jyldyq mereıtoıyna arnaıtynyn jetkizdi. «Álııa – jaýynger rýhtyń sımvoly. Meniń ár jetistigim – sol rýhtyń jalǵasy», deıdi jeńimpaz.
Abaı halqy úshin qýanysh munymen shektelgen joq. Semeı qalasy Sh.Ýálıhanov atyndaǵy «Jas Ulan» mamandandyrylǵan mektep-ınternatynyń komandasy respýblıkalyq áskerı mektepter arasynda tórtinshi jyl qatarynan Gran-prıdi ıelenip, jalpykomandalyq esepte úzdik atandy. Al «Abaı qyrandary» áskerı-patrıottyq klýby jalpykomandalyq esepte 1-oryndy ıelenip, «Smart Sarbaz» saıysynda 1-oryn, basqa da birneshe baǵytta júldeli oryndy enshiledi. Buǵan qosa oblys namysyn qorǵaǵan «Jas barlaýshy» komandasy týrnıkke tartylýdan 2-oryndy qanjyǵasyna baılady.
Osylaısha Abaı jastarynyń jeńisine súısinip, aımaqta áskerı-patrıottyq tárbıeniń joǵary deńgeıde berilip jatqanyna taǵy bir kóz jetkizdik.
Abaı oblysy
