Saltanatty sharada QR Ǵylym jáne joǵary bilim mınıstri Saıasat Nurbektiń túlekterge arnalǵan beınequttyqtaýy kórsetilip, jas mamandarǵa aqjarma tilekter joldandy.
Sonymen qatar ýnıversıtet rektory Bolat Tilep quttyqtaý sóz sóılep, bitirýshi túlekterdi osy mańyzdy kúnmen quttyqtap, olardyń kópjyldyq tabandy eńbekteri men oqý barysynda jetken jetistikterine joǵary baǵa berdi. Sondaı-aq, aldaǵy ómir jolynda sáttilik tilep, jas mamandardyń ýnıversıtet bedelin arttyryp, el ıgiligine adal qyzmet etetinine senim bildirdi.
«Siz osy qarashańyraqta boıyńyzǵa tek bilim ǵana emes, ómirlik baǵyt-baǵdar, adamı qundylyqtar men asqaq rýhty sińirdińiz. Árıne, bul Siz úshin aldaǵy ómir jolyńyzda senimdi serigińiz, bıik maqsattarǵa jeteleıtin altyn arqaý bolady dep senemin. Kásibı jolyńyz tabys pen sáttilikke toly bolǵaı!», dedi rektor.
Dıplom tabystaý rásiminde túlekterge ýnıversıtet atynan uly aqyn Abaı Qunanbaevtyń «Qara sózder» jınaǵy estelik retinde tartý etildi. Sondaı-aq, saltanatty sharada estrada ánshisi Jiger Aýypbaev arnaıy qonaq retinde qatysyp, óziniń ónerimen kesh qonaqtaryna merekelik kóńil kúı syılady.
Bıyl Matematıka, fızıka jáne ınformatıka fakýltetin 850 túlek sátti támamdap, joǵary bilim týraly dıplomǵa ıe boldy. Onyń ishinde 692 bakalavr jáne 156 magıstrant bar. Al 98 túlek oqý ornyn úzdik aıaqtap, «qyzyl dıplom» ıegeri atandy.
