Almatydaǵy qyzmeti erekshe emdeý mekemesiniń biri – Uly Otan soǵysy ardagerleriniń emhanasy «Memlekettik kommýnaldyq qazynalyq kásiporny». Aty aıtyp turǵandaı, emhana soǵys ardagerlerine jáne olarǵa teńestirilgen tulǵalarǵa, sonymen qatar aýmaqtyq tirkelgen turǵyndarǵa medısınalyq kómek kórsetetin qalalyq keńestik-dıagnostıkalyq ortalyq.
Bıyl atalmysh emdeý ortalyǵy aq samaıly ardagerlerdiń densaýlyqtaryn qadaǵalaýǵa qatysty keshendi is-sharalar júrgizýde.
Qazirgi tańda bul emhanany medısına ǵylymdarynyń doktory Qaldybaı Madıbraıymov basqarady. Aıtqandaı, ol kisi gerontologııa salasyndaǵy naýqastardyń densaýlyǵyn tekserý men emdeýdiń zamanaýı tehnologııalarynyń bastamashysy ekenin de aıta ketýge bolady. Osyǵan oraı, emhana gerontologtary qaladaǵy basqa emhanalardyń gerontologtarymen birlese otyryp, jyl basynan beri aýqymdy aksııalardy júzege asyrýda. Ashyq esik kúnderin ótkizip, emhanaǵa tirkelgen jandarǵa jan-jaqty kómek kórsetip otyr.
Atalmysh emhananyń onsyz da atqaratyn jumysy ardagerlerdi emdeý ekeni aıan. Degenmen, bul emhanada erekshe ahýal ornalasqan. Aýrýhana dárigerleri árbir ardagerge erekshe qurmetpen qaraıdy, esimderin jatqa biledi, ata-analary qaraǵandaı qurmet kórsetip otyrady. Úılerine udaıy habarlasyp, telefonmen bolsa da hal-jaǵdaılaryn surap, qajet bolǵan jaǵdaıda óz otbasylarynda dárigerlik kómek kórsetedi.
Al emhana bıyl «Otan qorǵaýshy kúni» men Jeńis kúnine arnap jyl basynan beri jumys istep keledi. Máselen, aqpan aıynda emhana gerontologtary Áýezov aýdanynda turatyn, biraq óz betinshe júrip-tura almaıtyn ardagerlerdiń úılerin aralap, qajetti dári-dármekteri bar qobdıshalarmen jabdyqtaǵan bolatyn.
Sol sııaqty Uly Otan soǵysy ardagerleriniń emhanasynyń bazasynda dóńgelek ústelder ótkizilip, gerontologtar jasy ulǵaıǵan pasıentterdiń densaýlyǵyn saqtaýdaǵy mańyzdy máselelerge qatysty baıandamalar jasap, soǵys ardagerlerine syı-qurmetterin de kórsetip otyrý ádemi úrdiske aınalǵan.
Emhanada Uly Otan soǵysy ardagerlerine jáne olarǵa teńestirilgen tulǵalarǵa, sonymen qatar aýmaqtyq tirkelgen turǵyndarǵa medısınalyq kómek kórsetý úshin dárigerler brıgadasy qurylǵan. Quramynda terapevt, stomatolog, nevropatolog, hırýrg, jalpyklınıkalyq analızder men EKG jasaıtyn dárigerleri bar brıgada kún saıyn ardagerlerin izdep, jolǵa shyǵady.
Oǵan qosa, kúndizgi stasıonarlarda da ardagerlerge kómek kórsetilip otyrady. Aq samaıly jandar kezegine, densaýlyǵyna qaraı «Ardager», «Aqqaıyń», «Almaty», «Qarǵaly» sanatorıılerinde emdeledi.
Qysqasy, atalmysh emhanada aı saıyn arnaıy aýqymdy sharalar, kún saıyn emdeý jumystary júrip jatyr. Máselen, tek naýryz aıynda 79 adamǵa 770 myń teńgege tegin stomatologııalyq qyzmet kórsetilgen.
Aınash ESALI, «Egemen Qazaqstan».
ALMATY.
