Alǵashqy ónim partııasy ýnıversıtettiń ǵylymı zerthanasynda arnaıy reseptýra boıynsha ázirlendi. Qoldanylǵan et ýnıversıtettiń óz aýmaǵynda ósirilgen saıǵaqtar men qustardan alynǵan.
«Biz saıǵaq etiniń kórsetkishterin zerttep, onyń mıkrobıologııalyq qaýipsizdigin tekserdik. Quramynda ishek taıaqshasy nemese ózge de zııandy bakterııalar bolmaýyn qadaǵaladyq», deıdi taǵam qaýipsizdigi zerthanasynyń meńgerýshisi Aıan Orazov.
Ǵalymdardyń aıtýynsha, joba tek reseptýramen shektelmeıdi – ónimniń dámi, sapasy jáne saqtaý merzimi de basty nazarda. Aıdana Bekbýsınova esimdi magıstrdiń málimetinshe, saıǵaq eti shyryndy bolyp shyqqan, al daıyn shujyq eki aptaǵa deıin saqtaýǵa jaramdy.
Bir saıǵaqtan orta eseppen 13–15 kg et alýǵa bolady. Qazirgi ýaqytta zerthanalyq top shujyq quramyn jetildirip, tehnologııaǵa patent alýdy, keıinirek – serııalyq óndiristi iske qosýdy josparlap otyr.
Atap ótý kerek, dál osy ýnıversıtettiń ǵalymdary buǵan deıin saıǵaq etin óńdeýdi zańdastyrý jáne retteý bastamasyn kótergen bolatyn. Olar bul qadam tabıǵı resýrstardy tıimdi paıdalanýǵa jáne paıdaly, ekologııalyq taza ónimdi naryqqa shyǵarýǵa múmkindik beredi dep esepteıdi.
Aımaqta 2,3 mıllıonǵa jýyq saıǵaq bar. Qazirgi tańda 800 myń bas saıǵaqty et jáne konserv óndirisi úshin shekteýli negizde alý múmkindigi qarastyrylyp jatyr.
