Bul qurlyqtyq aýqymdaǵy jyl saıynǵy dástúrli is-sharany AHQO-nyń Halyqaralyq tórelik ortalyǵy (HTO) Herbert Smith Freehills Kramer LLP zań fırmasymen birlesip uıymdastyrdy.
Aptalyqtyń ashylý saltanatynda AHQO Sotynyń tóraǵasy Meldon Lordy Bernett, Halyqaralyq tórelik ortalyǵynyń tóraǵasy Tomas Krıýmmel jáne Prezıdent Ákimshiliginiń memlekettik quqyq bólimi basshysynyń orynbasary Alma Muqanova, AHQO basqarýshysy Renat Bekturov sóz sóılep, halyqaralyq arbıtrajdy damytýǵa, qoldanylatyn zamanaýı tájirıbe men múmkindikterdi, syn-qaterler men sheshimderdi talqylaýǵa múmkindik beretin aptalyqtyń mán-mańyzyna toqtaldy.
Jalpy, bul aptalyqqa elimizden jáne syrt elderden 400-ge jýyq delegat tirkelgen. Bul is-sharada Halyqaralyq jekeshe quqyqty birizdendirý ınstıtýtynyń (UNIDROIT) prezıdenti, halyqaralyq arbıtraj salasyndaǵy álemge áıgili sarapshy, professor Marııa Kıara Malagýtımen ótetin sessııa kúnniń mańyzdy sátteriniń biri boldy.
Ol Italııanyń Syrtqy ister mınıstrligine saýda máseleleri boıynsha keńes berip, Dúnıejúzilik bank, Eýropalyq ortalyq bank jáne Eýropalyq Odaq Soty sekildi úlken uıymdarǵa zańgerlik qoldaý kórsetetin bilikti sarapshy.
Uıymdastyrýshylardyń aıtýynsha, bıylǵy is-shara baǵdarlamasynda alty sessııa qarastyrylǵan. Qonaqtar arbıtraj jáne daýlardy balama sheshý joldaryndaǵy sońǵy úrdistermen, sondaı-aq transshekaralyq daý-janjaldarda taraptar arasyndaǵy ózara tájirıbesimen tanysady. Baǵdarlama aıasynda Qazaqstandaǵy ınvestısııalyq ahýal men ınvestorlardyń quqyqtyq qorǵalý máseleleri qarastyrylady.
Budan bólek, konferensııa aıasynda daýlardy sheshý salasyndaǵy halyqaralyq yntymaqtastyqty damytýǵa baǵyttalǵan birqatar ekijaqty kelisimderge qol qoıyldy.
