– Festıval aıasynda qoıdyń kúzem júninen aldyn ala sabap, negizin jáne taldyrmalardy daıyndap aldyq. Sodan soń barlyq túrki jurtynyń qolóner sheberlerimen birlesip, óner týyndysyna ár eldiń ulttyq órnegin kómkerdik. Osy órnekterdiń ortasyna «Aqtaý – Túrki áleminiń mádenı astanasy» jobasynyń logotıpin ornalastyrdyq. Bireýimiz bir jaǵynan órnegin salsaq, endi birimiz logotıptiń detaldaryn tolyqtyrdyq. Qoldan jasaǵan ulttyq materıal túrki halyqtary birliginiń nyshany ispettes, – dedi Túrikmenstan Respýblıkasynyń dızaıneri Aına Dýrdylyıeva.
Is-sharaǵa jalpy 15 sheteldik jáne 30 jergilikti sheber qatysty.
– Tekemet, kıiz – tek turmys buıymy emes, ol – ár ulttyń bolmysyn, saltyn, rýhyn boıyna sińirgen máńgilik óner týyndysy. Ár órnek – júrekten shyqqan mura, ár ıirim – urpaqqa arnalǵan amanat. Búgin bastalatyn bul jumys – túrki halyqtarynyń birligin, baýyrlastyǵyn, taǵylymdy tarıhyn bederleıtin rámizdik kórinis, – dedi uıymdastyrýshylar.
Sondaı-aq óńir turǵyndary ár ulttyń dástúrli qolónerin tamashalap qana qoımaı, týyndylardyń shyǵý tarıhymen tanysty. Festıvaldiń jabylý saltanatynda otandyq jáne sheteldik dızaınerlerdiń týyndylarynan sán kórsetilimi uıymdastyryldy. Atap aıtqanda, Túrikmenstan dızaıneri Aına Dýrdylyıeva, Qyrǵyzstan dızaıneri Asyljan Qambarova, О́zbekstan dızaıneri Nargıza Mýsajanova, mońǵolııalyq Sývd Banzragchtyń týyndylary jáne jergilikti «Jadaǵaı», «Masakova», «Nurshah», «Tárbııa» sán úıleriniń toptamalary kórsetildi. Saltanatty sharaǵa TÚRKSOI halyqaralyq uıymynyń Bas hatshysy Sultan Raev qatysyp, mundaı ıgi sharalar tyǵyz yntymaqtastyqtyń arqasynda júzege asyp jatqandyǵyn aıtty.
– Kaspıı teńiziniń jaǵasynda eki kún boıy erekshe mádenı kezdesýdiń kýási boldyq. Dala rýhyn zamanaýı úlgimen ushtastyrǵan bul sán toptamalary tek kıim nemese qolóner buıymy ǵana emes, ortaq bolmysymyzdyń, ótkenimiz ben keleshegimizdiń rámizine aınaldy. Biz olardyń árqaısysymen maqtanamyz. TÚRKSOI uıymy retinde biz ortaq mádenı muramyzdy dáripteýdi ári osyndaı jobalarǵa qoldaý kórsetýdi jalǵastyra beremiz. Árıne, mundaı ıgi sharalar bekem birliktiń arqasynda júzege asýda. Barshańyzǵa shyǵarmashylyq tabys tileımin, aldaǵy jobalarda da birlese jumys isteýdi jalǵastyra berýge nıettimiz, – dedi Sultan Raev.
Kesh barysynda óner ıelerine TÚRKSOI halyqaralyq uıymynyń Bas hatshysy Sultan Raev pen Mańǵystaý oblysy ákiminiń orynbasary Abbat О́risbaev arnaıy marapattar tabystady.
Sonymen qatar saltanatty sharaǵa arnaıy shaqyrylǵan qonaq, dástúrli ánshi Aıgúl Elshibaeva óner kórsetip, kórermendi áýezdi ánmen tánti etti.
