«2025 jylǵy 1 shildede balanyń jaǵdaıy turaqtanǵan soń, 2014 jyly týǵan naýqas Qarasaı aýdanynyń Ortalyq aýdandyq aýrýhanasynan Oblystyq balalar klınıkalyq aýrýhanasyna aýystyryldy. Ol jansaqtaý bólimine jatqyzyldy. Naýqastyń jaǵdaıy – aýyr, biraq turaqty, nasharlaý belgileri joq. Esin biledi. Naýqaspen jáne onyń anasymen klınıkalyq psıholog jumys istep jatyr», dedi Almaty oblystyq Densaýlyq saqtaý basqarmasynyń baspasóz qyzmeti.
Naýqasty Qazaq medısınalyq ýnıversıtetiniń neırohırýrgi men Qazaq ulttyq medısına ýnıversıtetiniń professory qaraǵan. Oblystyq densaýlyq saqtaý basqarmasy emniń tolyq kólemde, klınıkalyq hattamalarǵa sáıkes júrgizilip jatqanyn atap ótti.
Aıta keteıik, oqıǵa 30 maýsym kúni tús mezgilinde Qarasaı aýdanyna qarasty Jalpaqsaı aýylynda bolǵan. Úsh birdeı agressıvti ıt jeke aýmaqtan shyǵyp ketip, adamdardyń kózinshe fýtbol alańynda oınap júrgen 10 jastaǵy balaǵa shabýyl jasaǵan. Bala jansaqtaý bólimine tústi.
